Read Papantla Totonac Filipensenan 2 Bible Online

Filipensenan 2 - Papantla Totonac bible

Filipensenan 2

¹Pesei, si tin algun enkurashamentu den Cristo, si tin algun konsolashon di amor, si tin algun komunion di e Spiritu, si tin algun sintimentu profundo i kompashon,

²hasi mi goso kompleto dor di keda di akuerdo ku otro, manteniendo e mesun amor, uni den spiritu, teniendo un solo proposito.

³No hasi nada ku un aktitut di egoismo of orguyo, ma ku umildat laga kada un di boso konsidera e otro mas importante ku e mes;

⁴no buska boso interes personal so, ma buska tambe interes di otronan.

⁵Laga tin den boso e aktitut aki ku tabatin tambe den Cristo Jesus,

⁶Kende, ounke ku E tabata eksisti den e forma di Dios, no a konsidera igualdat ku Dios algu pa tene na dje,

⁷ma a bandona Su mes gloria, tumando forma di un sirbido, siendo traha den e semehansa di hende.

⁸I hanando Su mes den kondishon di hende, El a umiya Su mes dor di bira obedesido te na morto, asta morto na un krus.

⁹Pesei tambe Dios a hals'E te na e halturanan, i a dun'E e nomber ku ta riba tur nomber,

¹⁰ku pa e nomber di Jesus tur rudia mester dobla, di esnan ku ta den shelu, i riba tera, i bou di tera,

¹¹i ku tur lenga mester konfesa ku Jesu-Cristo ta Senor, pa e gloria di Dios Tata.

¹²Asina anto, mi stimanan, meskos ku semper boso a obedese, no manera den mi presensia solamente, ma a wor muchu mas den mi ousensia, traha riba boso salbashon ku temor i temblamentu;

¹³pasobra ta Dios ta Esun ku ta obra den boso, tantu pa kier komo pa hasi segun Su bon boluntat.

¹⁴Hasi tur kos sin murmura ni diskuti,

¹⁵pa boso por proba boso mes di ta sin kulpa i inosente, yunan di Dios sin reproche meimei di un generashon korumpi i perverso, entre kualnan boso ta briya manera lusnan den mundu,

¹⁶teniendo duru na e palabra di bida, pa den e dia di Cristo mi por tin motibu pa gloria, pasobra mi no a kore en bano, ni a traha en bano.

¹⁷Ma ounke mi wordu basha komo un ofrenda di bibida riba e sakrifisio i sirbishi di boso fe, mi ta regosiha i ta komparti mi goso ku boso tur.

¹⁸I boso tambe, regosiha na e mesun manera i komparti boso goso ku mi.

¹⁹Ma mi ta spera den Senor Jesus di manda Timoteo pronto serka boso, pa ami tambe por wordu enkurasha ora mi tende kon ta bai ku boso.

²⁰Pasobra mi no tin ni un otro hende di e mesun spiritu ku lo preokupa sinseramente pa boso bienestar.

²¹Pasobra nan tur ta buska nan mes interesnan, no esnan di Cristo Jesus.

²²Ma boso tin prueba di su fieldat, ku el a sirbi huntu ku mi, manera un yu ku su tata, den e trabou di evangelio.

²³Pesei mi ta spera di mand'e mesora, asina ku mi mira kon ta bai ku mi mes asuntonan;

²⁴i mi ta konfia den Senor ku ami mes tambe lo bin pronto.

²⁵Ma mi a hana nesesario pa manda Epafrodito serka boso, mi ruman i mi kompanero solda, huntu ku mi, kende tambe ta boso mensahero i kende ta yudami den mi nesesidatnan;

²⁶pasobra e tabata anhela na boso tur i tabata preokupa, pasobra boso a tende ku e tabata malu.

²⁷Pasobra di berdat e tabata malu pa muri, ma Dios a tene miserikordia di dje, i no solamente di dje ma di mi tambe, pa mi no mester tin tristesa riba tristesa.

²⁸Pesei mi a mand'e mas pronto posibel, pa ora boso mir'e atrobe, boso por regosiha, i ami por ta menos preokupa pa boso.

²⁹Pesei, risibie den Senor ku tur goso, i trata hombernan asina ku gran apresio;

³⁰pasobra el a hera muri pa e obra di Cristo, riskando su bida pa kompleta loke boso tabata falta den boso sirbishi na mi.