Read Papantla Totonac Filipensenan 3 Bible Online

Filipensenan 3 - Papantla Totonac bible

Filipensenan 3

¹Finalmente, mi rumannan, regosiha den Senor. Pa bolbe skirbi e mesun kosnan no ta molester pa mi, i ta un siguridat pa boso.

²Warda boso di e kachonan, warda boso di e mal trahadonan, warda boso di e sirkumsishon falsu;

³pasobra nos ta e sirkumsishon berdadero, ku ta adora den e Spiritu di Dios i ta gloria den Cristo Jesus, i ku no ta pone konfiansa den e karni,

⁴ounke ku ami mes por tin motibu di tin konfiansa den e karni. Si algun otro hende ta kere di por pone konfiansa den e karni, ami muchu mas:

⁵sirkumsida riba e di ocho dia, di e nashon di Israel, di e tribu di Benjamin, un hebreo di hebreonan; enkuanto Lei, un fariseo;

⁶enkuanto zelo, un persiguido di iglesia; enkuanto e hustisia ku tin den Lei, sin kulpa.

⁷Ma tur kos ku tabata ganashi pa mi, e kosnan ei mi a konsidera komo pierde pa kousa di Cristo.

⁸Mas ku esei, mi ta konsidera tur kos komo pierde kompara ku e balor superior di konose Cristo Jesus mi Senor, pa Kende mi a sufri pierde di tur kos, i ta konsidera nan komo basura, pa mi por gana Cristo,

⁹i por wordu hana den djé, no teniendo un hustisia di mi mes ku ta bin for di Lei, ma esun ku ta dor di fe den Cristo, e hustisia ku ta bin di Dios pa medio di fe,

¹⁰pa mi por konos'E, i e poder di Su resurekshon i e komunion di Su sufrimentunan, birando semehante na djé den Su morto,

¹¹pa mi por alkansa e resurekshon for di e mortonan.

¹²No ku mi a alkansa esaki kaba, of ku mi a bira perfekto kaba, ma mi ta hasi tur esfuerso pa mi por gara e loke pa kual ami tambe a wordu gara dor di Cristo Jesus.

¹³Rumannan, mi no ta pretende ku mi mes a gar'e kaba; ma un kos mi ta hasi: lubidando loke ta keda atras i aspirando na loke ta dilanti,

¹⁴mi ta hasi tur esfuerso pa alkansa e meta, pa hana e premio di e yamada selestial di Dios den Cristo Jesus.

¹⁵Pesei, laga nos tur ku ta perfekto tin e aktitut aki; i si den kualkier kos boso tin un aktitut diferente, Dios lo revela esei tambe na boso;

¹⁶sinembargo, laga nos sigui biba na e mesun nivel ku nos a alkansa kaba.

¹⁷Rumannan, uni boso pa sigui mi ehempel, i opserva esnan ku ta kana segun e patronchi ku boso a mira den nos.

¹⁸Pasobra hopi ta kana, di kendenan mi a bisa boso hopi biaha, i ta bolbe bisa boso na yoramentu, ku nan ta enemigu di e krus di Cristo,

¹⁹kende nan fin ta destrukshon, kende nan dios ta nan barika, i kende nan gloria ta den nan berguensa, kendenan ta pone nan mente riba kosnan terenal.

²⁰Ma nos siudadania ta den shelu, for di unda nos ta spera ansiosamente pa un Salbador, e Senor Jesu-Cristo,

²¹Kende lo transforma nos kurpa despresiabel pa e bira meskos ku Su kurpa glorioso, pa medio di e poder ku E tin pa tambe hasi tur kos somete nan mes na djé.