Read Papantla Totonac Filipensenan 4 Bible Online

Filipensenan 4 - Papantla Totonac bible

Filipensenan 4

¹Pesei, mi rumannan stima, ku mi ta anhela di mira, mi goso i korona, asina anto, mi stimanan, para firme den Senor.

²Mi ta roga Euodias i mi ta roga Sintike pa nan biba den harmonia ku otro den Senor.

³Mi ta rogabo tambe, mi kompanero fiel, pa bo yuda e muhenan aki, kendenan a komparti mi lucha pa kousa di evangelio, huntu ku Clemente tambe, i mi otro kompaneronan, kende nan nombernan ta den e buki di bida.

⁴Regosiha den Senor semper; atrobe lo mi bisa, regosiha!

⁵Laga boso karino ta konosi na tur hende. Senor ta serka.

⁶No preokupa pa nada; ma den tur kos, pa medio di orashon i suplika ku gradisimentu, laga boso petishonnan ta konosi dilanti di Dios.

⁷I e pas di Dios, ku ta surpasa tur komprendementu, lo warda boso kurason i boso mente den Cristo Jesus.

⁸Finalmente, rumannan, tur loke ta berdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama, si tin algun birtut i si tin algu digno di alabansa, laga esakinan okupa boso mente.

⁹E kosnan ku boso a sina i a risibi i a tende i a mira den mi, praktika e kosnan aki; i e Dios di pas lo ta ku boso.

¹⁰Ma mi a regosiha masha hopi den Senor, ku awor porfin boso a rebiba boso perkurashon pa mi; di berdat boso tabata preokupa pa mi, ma boso no tabatin oportunidat.

¹¹No ku mi ta papia pasobra mi tin nesesidat; pasobra mi a sina di ta kontentu den ki sirkumstansia ku mi hanami aden.

¹²Mi sa di biba humilde, i mi sa tambe di biba den prosperidat; den kualkier i den tur sirkumstansia mi a sina e sekreto di ta barika yen i di pasa hamber, tantu di tin abundansia komo di pasa nesesidat.

¹³Tur kos mi por den Cristo, Kende ta dunami fortalesa.

¹⁴Sinembargo, boso a hasi bon di komparti ku mi den mi aflikshon.

¹⁵I boso mes sa tambe, filipensenan, ku na prinsipio di e predikamentu di evangelio, despues ku mi a sali for di Masedonia, ningun iglesia no a tuma parti huntu ku mi den e asunto di duna i risibi, sino boso so;

¹⁶pasobra tambe na Tesalonika boso a manda mas di un biaha loke mi tabatin mester.

¹⁷No ku mi ta buska e regalo mes, ma mi ta buska e fruta ku ta akumulando na boso kuenta.

¹⁸Ma mi a risibi tur kos i mi tin na abundansia; mi ta yen, despues di a risibi for di Epafrodito loke boso a manda, un holo dushi, un sakrifisio aseptabel, agradabel na Dios.

¹⁹I mi Dios lo provee tur loke boso tin mester, segun Su rikesa den gloria den Cristo Jesus.

²⁰Awor na nos Dios i Tata sea gloria pa semper i semper. Amen.

²¹Saluda tur santu den Cristo Jesus. E rumannan ku ta huntu ku mi ta saluda boso.

²²Tur e santunan ta saluda boso, spesialmente esnan ku ta di e kas di Cesar.

²³Grasia di Senor Jesu-Cristo sea ku boso spiritu. Amen.