Read Papantla Totonac Kolosensenan 1 Bible Online

Kolosensenan 1 - Papantla Totonac bible

Kolosensenan 1

¹Pablo, un apostel di Jesu-Cristo pa e boluntat di Dios, i Timoteo nos ruman,

²Na e santunan i rumannan fiel den Cristo ku ta na Kolosas: Grasia na boso i pas di Dios nos Tata.

³Nos ta duna gradisimentu na Dios, Tata di nos Senor Jesu-Cristo, semper hasiendo orashon pa boso,

⁴komo ku nos a tende di boso fe den Cristo Jesus i e amor ku boso tin pa tur e santunan,

⁵pa motibu di e speransa ku ta warda pa boso den shelu, di kual boso a tende kaba den e palabra di berdat, e evangelio

⁶ku a yega serka boso, meskos ku den henter mundu tambe e ta duna fruta i ta sigui krese konstantemente, meskos ku el a hasi den boso tambe for di dia ku boso a tende di dje i a komprende den berdat e grasia di Dios;

⁷meskos ku boso a sina esaki for di Epafras, nos ko-sirbido stima, kende ta un fiel sirbido di Cristo pa nos motibu;

⁸i tambe el a pone nos na haltura di boso amor den e Spiritu.

⁹Pa e motibu aki tambe, for di e dia ku nos a tende di esaki, nos no a stop di hasi orashon pa boso i di pidi pa boso por wordu yena ku e konosementu di Su boluntat den tur sabiduria spiritual i komprendementu.

¹⁰I nos ta pidi pa boso kana na un manera digno di Senor, pa agrad'E den tur sentido, dunando fruta den tur bon obra i kresiendo den e konosementu di Dios,

¹¹siendo fortifika ku tur poder, segun Su forsa glorioso, pa hana tur perseveransia i pasenshi, i ku goso

¹²dunando gradisimentu na e Tata, Kende a kualifika nos pa tuma parti den e erensia di e santunan den e lus.

¹³Pasobra El a libra nos di e poder di skuridat, i a traslada nos pa e reino di Su Yu stima,

¹⁴den Kende nos tin redenshon, e pordon di pikanan.

¹⁵I E ta e imagen di e Dios invisibel, e primogenito di henter kreashon.

¹⁶Pasobra pa medio di djé tur kos a wordu krea, tantu den e shelunan komo riba tera, visibel i invisibel, sea trononan of dominionan of gobernantenan of outoridatnan--tur kos a wordu krea pa medio di djé i p'E.

¹⁷I E ta prome ku tur kos, i den djé tur kos ta konsisti.

¹⁸E ta tambe kabes di e kurpa, e iglesia; i E ta e prinsipio, e primogenito for di e mortonan; pa E mes por bin hana e prome luga den tur kos.

¹⁹Pasobra a agrada e Tata pa henter e plenitut biba den djé,

²⁰i dor di djé rekonsilia tur kos kuné mes, siendo ku El a hasi pas kaba dor di e sanger di Su krus; dor di djé, mi ta bisa, tantu kosnan riba tera komo kosnan den shelu.

²¹I maske anteriormente boso tabata stranhero i enemigu den mente, okupa ku mal echonan,

²²tog awor El a rekonsilia boso den e kurpa di Su karni dor di morto, pa presenta boso Su dilanti santu i sin kulpa i sin ningun reproche--

²³si di berdat boso ta sigui den e fe, firmemente funda i stabil, i no ta wordu movi for di e speransa di e evangelio ku boso a tende, kual a wordu proklama den henter kreashon bou di shelu, i di kual ami, Pablo, a wordu hasi un sirbido.

²⁴Awor mi ta regosiha den mi sufrimentunan pa boso kousa, i den mi karni mi ta hasi mi parti pa kousa di Su kurpa (kual ta e iglesia), dor di yena loke ta falta den e aflikshonnan di Cristo.

²⁵Di e iglesia aki mi a wordu hasi un sirbido segun e mayordomia di Dios duna na mi pa boso benefisio, pa mi por kumpli debidamente ku e predikamentu di e palabra di Dios,

²⁶esta, e misterio ku tabata skondi for di e siglonan i generashonnan pasa, ma ku awor a wordu manifesta na Su santunan,

²⁷na kendenan Dios kier a hasi konosi kual ta e rikesanan di e gloria di e misterio aki den e paganonan, ku ta Cristo den boso, e speransa di gloria.

²⁸I nos ta proklam'E, spiertando tur hende i sinando tur hende ku tur sabiduria, pa nos presenta tur hende perfekto den Cristo.

²⁹I pa e proposito aki tambe mi ta traha, luchando segun Su poder ku ta obra poderosamente den mi.