Read Papantla Totonac Kolosensenan 4 Bible Online

Kolosensenan 4 - Papantla Totonac bible

Kolosensenan 4

¹Shonnan, duna boso esklabunan loke ta hustu i korekto, sabiendo ku boso tambe tin un Shon den shelu.

²Dedika boso mes na orashon, keda alerta den dje ku un aktitut di gradisimentu;

³i na e mesun tempu hasi orashon pa nos tambe, pa Dios habri un porta pa nos pa e palabra, pa nos anunsia e misterio di Cristo, pa kual tambe mi a wordu poni den prizon;

⁴pa mi por proklam'e klaramente na e manera ku mi mester papia.

⁵Komporta boso ku sabiduria pa ku esnan di pafo, hasiendo bon uzo di e oportunidat.

⁶Laga boso palabranan ta semper ku grasia, sasona ku salu, pa boso por sa kon boso mester kontesta kada persona.

⁷Tokante di tur mi asuntonan, Tikiko, nos ruman stima i sirbido fiel i kompanero den sirbishi di Senor, lo trese informashon pa boso.

⁸Pasobra mi a mand'e serka boso hustamente pa e proposito aki, pa boso por sa di nos sirkumstansianan i pa e por enkurasha boso kurason;

⁹i huntu kune Onesimo, nos ruman fiel i stima, kende ta un di boso. Nan lo pone boso na haltura di henter e situashon akinan.

¹⁰Aristarko, mi kompanero di den prizon, ta manda saluda boso; i tambe Barnabas su primo, ku yama Marko, (tokante di kende boso a risibi instrukshonnan: si e bin serka boso, yam'e bonbini);

¹¹i tambe Jesus, kende ta wordu yama Justu; esakinan ta e uniko kompaneronan di trabou pa e reino di Dios, kendenan ta di e sirkumsishon; i nan a proba di ta un enkurashamentu pa mi.

¹²Epafras, kende ta un di boso, un sirbido di Jesu-Cristo, ta manda saluda boso, semper luchando seriamente pa boso den su orashonnan, pa boso por para firme, perfekto i kompletamente sigur den henter e boluntat di Dios.

¹³Pasobra mi ta duna testimonio di dje ku e tin un preokupashon profundo pa boso i pa esnan ku ta na Laodisea i Hierapolis.

¹⁴Lukas, e dokter stima, ta manda saluda boso, i tambe Demas.

¹⁵Saluda e rumannan ku ta na Laodisea, i tambe Ninfas i e iglesia ku ta na su kas.

¹⁶I ora ku e karta aki wordu lesa meimei di boso, laga les'e tambe den e iglesia di e laodisensenan; i boso, di boso parti, lesa mi karta ku ta bin for di Laodisea.

¹⁷I bisa Arkipo: "Paga atenshon na e ministerio ku bo a risibi den Senor, pa bo kumpli kune."

¹⁸Ami, Pablo, ta skirbi e saludo aki ku mi mes man. Korda mi kadenanan. Grasia sea ku boso. Amen.