Read Papantla Totonac 1 Tesalonisensenan 2 Bible Online

1 Tesalonisensenan 2 - Papantla Totonac bible

1 Tesalonisensenan 2

¹Pasobra boso mes sa, rumannan, ku nos binimentu serka boso no tabata en bano,

²ma despues ku nos a sufri kaba i a wordu maltrata na Filipos, manera boso sa, den nos Dios nos tabatin e kurashi di papia e evangelio di Dios ku boso meimei di hopi oposishon.

³Pasobra nos eksortashon no ta bin for di eror, ni di impuresa, ni ku engano;

⁴ma meskos ku nos a wordu aproba dor di Dios pa wordu konfia ku e evangelio, asina nos ta papia, no pa agrada hende sino Dios, Kende ta proba nos kurason.

⁵Pasobra nunka nos no a bin ku labiamentu, manera boso sa, ni nos no a uza ningun preteksto pa satisfase nos golosidat--Dios ta testigu--

⁶ni nos no a buska gloria serka hende, ni serka boso, ni serka otronan. Komo apostel di Cristo nos por a hasi uzo di nos outoridat,

⁷ma nos tabata karinoso meimei di boso, manera un menchi ta kuida su mes yunan ku ternura.

⁸Teniendo pues un amor grandi pa boso, a agrada nos pa no solamente komparti e evangelio di Dios ku boso, ma tambe nos mes bida, pasobra boso a bira masha stima pa nos.

⁹Pasobra boso ta korda, rumannan, nos trabou i esfuerso, kon, trahando di dia i anochi pa no ta un karga pa ningun di boso, nos a proklama na boso e evangelio di Dios.

¹⁰Boso ta testigu, i Dios tambe, kon santu i korekto i sin kulpa nos a komporta nos mes pa ku boso, kreyentenan;

¹¹meskos ku boso sa kon nos tabata eksorta i enkurasha i roga kada un di boso, manera un tata su mes yunan,

¹²pa boso kana na un manera digno di e Dios, Kende ta yama boso den Su mes reino i gloria.

¹³I pa e motibu aki nos ta gradisi Dios konstantemente tambe, ku ora boso a risibi for di nos e palabra di Dios Su mensahe, boso a asept'e no komo palabra di hende, ma pa loke e ta berdaderamente, e palabra di Dios ku ta obra tambe den boso ku ta kere.

¹⁴Pasobra boso, rumannan, a bira imitadonan di e iglesianan di Dios den Cristo Jesus ku ta na Judea, pasobra boso tambe a soporta e mesun sufrimentunan na man di boso mes paisanonan, meskos ku nan a sufri di e hudiunan,

¹⁵kendenan a mata tantu Senor Jesus komo e profetanan, i a persigui nos. Nan no ta agradabel na Dios, ma enemigu di tur hende,

¹⁶i ta stroba nos di papia ku e paganonan pa nan wordu salba, ku e resultado ku semper nan ta yena e midi di nan pikanan. Ma furia a bin riba nan te na fin.

¹⁷Ma nos, rumannan, siendo separa for di boso pa un tempu kortiku--di bista, no di kurason--tabata ansioso ku gran deseo pa mira boso kara.

¹⁸Pasobra nos kier a bin serka boso--ami, Pablo, mas ku un biaha--ma Satanas a stroba nos.

¹⁹Pasobra ta ken ta nos speransa of goso of korona di gloria? No ta boso den e presensia di nos Senor Jesus na Su binida?

²⁰Pasobra boso ta nos gloria i goso.