Read Papantla Totonac 1 Tesalonisensenan 4 Bible Online

1 Tesalonisensenan 4 - Papantla Totonac bible

1 Tesalonisensenan 4

¹Finalmente anto, rumannan, nos ta pidi i spierta boso den Senor Jesus, pa, meskos ku boso a sina di nos kon boso mester kana i agrada Dios (meskos ku boso ta kana awor), boso sobresali mas i mas.

²Pasobra boso sa ki mandamentunan nos a duna boso pa medio di Senor Jesus.

³Pasobra esaki ta e boluntat di Dios: boso santifikashon, esta, pa boso apstene boso di inmoralidat seksual,

⁴pa kada un di boso sa kon pa tene su mes kurpa den santifikashon i onor,

⁵no ku pashon di deseonan karnal, manera e paganonan ku no konose Dios;

⁶i ku ningun hende no transgresa ni defrouda su ruman den nada, pasobra Senor ta e vengado den tur e kosnan aki, meskos ku nos tambe a bisa boso kaba i a spierta boso.

⁷Pasobra Dios no a yama nos pa ta impuru, ma pa hiba un bida santu.

⁸Pesei, esun ku rechasa esaki, no ta hende e ta rechasa, sino e Dios ku ta duna Su Spiritu Santu na boso.

⁹Awor tokante di e amor di ruman no tin mester di skirbi boso, pasobra ta Dios ta sina boso stima otro;

¹⁰pasobra di berdat boso ta hasi esaki ku tur e rumannan ku ta den henter Masedonia. Ma nos ta roga boso, rumannan, pa sobresali mas i mas.

¹¹Aspira pa hiba un bida ketu i pa atende boso ku boso mes asunto i pa traha ku boso man, meskos ku nos a ordena boso,

¹²pa boso por komporta boso desentemente pa ku esnan di pafo, i pa boso no tin ningun nesesidat.

¹³Ma nos no kier, rumannan, pa boso keda den ignoransia tokante di esnan ku a muri, pa boso no ta tristu manera e otronan ku no tin speransa.

¹⁴Pasobra si nos ta kere ku Jesus a muri i a lanta atrobe, meskos tambe Dios lo trese huntu kuné esnan ku a muri den Jesus.

¹⁵Pasobra esaki nos ta bisa boso pa medio di e palabra di Senor: nos ku ta bibu, i ku ta keda te na e binida di Senor, lo no bai dilanti di esnan ku a muri.

¹⁶Pasobra Senor mes lo baha for di shelu ku un gritu, ku bos di arkangel i ku trompet di Dios; i e mortonan den Cristo lo lanta prome.

¹⁷E ora ei nos ku ta na bida, i ku a keda, lo wordu tuma den e nubianan huntu ku nan pa kontra ku Senor den laira, i asina nos lo ta semper ku Senor.

¹⁸Pesei, konsola otro ku e palabranan aki.