Read Papantla Totonac 1 Tesalonisensenan 5 Bible Online

1 Tesalonisensenan 5 - Papantla Totonac bible

1 Tesalonisensenan 5

¹Awor tokante di e tempunan i e epokanan, rumannan, no tin mester di skirbi boso nada.

²Pasobra boso mes sa masha bon ku e dia di Senor lo bin meskos ku un ladron den anochi.

³Mientras ku nan ta bisa: "Pas i siguridat!" perdishon lo bin riba nan direpiente, manera dolo di parto riba un muhe na estado; i nan lo no skapa.

⁴Ma boso, rumannan, no ta den skuridat, ku e dia ei lo a sorprende boso manera un ladron;

⁵pasobra boso tur ta yunan di lus i yunan di dia. Nos no ta di anochi ni di skuridat;

⁶asina anto, no laga nos drumi manera otronan ta hasi, ma laga nos ta alerta i sobrio.

⁷Pasobra esnan ku ta drumi, ta anochi nan ta drumi, i esnan ku ta bira burachi, ta anochi nan ta bira burachi.

⁸Ma komo ku nos ta di dia, laga nos ta sobrio, despues di a bisti e korasa di fe i amor, i komo helm e speransa di salbashon.

⁹Pasobra Dios no a destina nos pa furia, ma pa optene salbashon pa medio di nos Senor Jesu-Cristo,

¹⁰Kende a muri pa nos, pa sea nos ta lanta of drumi, nos biba huntu kuné.

¹¹Pesei, enkurasha otro i edifika otro, meskos ku boso ta hasiendo tambe.

¹²Ma nos ta pidi boso, rumannan, pa boso apresia esnan ku ta traha diligentemente meimei di boso, i ku ta guia boso den Senor i ta spierta boso,

¹³i pa boso tin masha hopi apresio pa nan den amor, pa motibu di nan trabou. Biba na pas ku otro.

¹⁴I nos ta roga boso, rumannan, spierta esnan ku ta hiba un bida desordena, enkurasha esnan ku ta falta animo, yuda e debilnan, tene pasenshi ku tur hende.

¹⁵Mira pa ni un hende no paga otro malu ku malu, ma semper buska loke ta bon pa otro i pa tur hende.

¹⁶Regosiha semper;

¹⁷hasi orashon sin stop;

¹⁸sea gradisido den tur kos; pasobra esaki ta e boluntat di Dios pa boso den Cristo Jesus.

¹⁹No paga e Spiritu;

²⁰no despresia profesia.

²¹Samina tur kos; tene duru na loke ta bon;

²²apstene di tur forma di maldat.

²³Awor, ku e Dios di pas mes santifika boso kompletamente; i ku boso spiritu i alma i kurpa sea preserva kompleto, sin kulpa na e binida di nos Senor Jesu-Cristo.

²⁴Fiel ta Esun ku ta yama boso, i E lo hasi esaki sosode tambe.

²⁵Rumannan, hasi orashon pa nos.

²⁶Saluda tur e rumannan ku un sunchi santu.

²⁷Mi ta ordena boso bou di huramentu den nomber di Senor pa laga e karta aki wordu lesa pa tur e rumannan.

²⁸Grasia di nos Senor Jesu-Cristo sea ku boso. Amen.