Read Papantla Totonac Josue 1 Bible Online

Josue 1 - Papantla Totonac bible

Josue 1

¹Awor a sosode despues di e morto di Moises, sirbido di SENOR, ku SENOR a papia ku Josue, yu homber di Nun, Moises su sirbido, bisando:

²"Moises, Mi sirbido, a muri; pesei, lant'ariba awor, krusa e Jordan aki, abo i henter e pueblo aki, bai na e tera ku Mi ta duna nan--e yunan di Israel.

³Tur luga ku boso plant'i pia trapa, Mi a duna boso, manera Mi a bisa Moises.

⁴For di e desierto i e Libano aki te na e riu grandi, Riu Eufrates, henter e tera di e heteonan, i te na Laman Grandi den direkshon di kaminda solo ta baha, lo ta boso teritorio.

⁵Ningun hende lo no por para bo dilanti tur e dianan di bo bida. Meskos ku Mi tabata ku Moises, asina lo Mi ta ku bo; lo Mi no fayabo ni bandonabo.

⁶"Sea fuerte i tene kurashi, pasobra abo lo hasi e pueblo aki ereda e tera ku Mi a hura nan tatanan ku Mi ta duna nan.

⁷Solamente, sea fuerte i tene hopi kurashi; perkura di hasi konforme henter e lei ku Mi sirbido Moises a ordenabo; no bira for di dje ni na man drechi ni na man robes, pa bo por tin eksito unda ku bo bai.

⁸E buki di lei aki lo no aparta for di bo boka, ma bo mester medita den dje di dia i anochi, pa bo perkura di hasi konforme tur loke ta para skirbi den dje; pasobra e ora ei lo bo hasi bo kaminda prospera, i e ora ei lo bo tin eksito.

⁹No ta Ami a ordenabo? Sea fuerte i tene kurashi! No tembla ni desmaya, pasobra SENOR bo Dios ta ku bo unda ku bo bai."

¹⁰E ora ei Josue a ordena e ofisialnan di e pueblo, bisando:

¹¹"Pasa meimei di e kampamentu i ordena e pueblo, bisando: 'Prepara provishon pa boso mes, pasobra denter di tres dia boso mester krusa e Jordan aki, pa drenta i podera di e tera ku SENOR boso Dios ta duna boso pa podera di dje.'"

¹²I na e rubenitanan i e gaditanan i na e mitar tribu di Manases, Josue a bisa:

¹³"Korda e palabra ku Moises, sirbido di SENOR, a ordena boso, bisando: 'SENOR boso Dios ta duna boso sosiegu, i lo duna boso e tera aki.'

¹⁴Boso esposanan, boso yu chikitunan i boso bestianan mag keda den e tera ku Moises a duna boso na e otro banda di Jordan, ma boso mester krusa den ordu militar dilanti di boso rumannan, tur boso guereronan balente, i lo yuda nan,

¹⁵te dia SENOR duna boso rumannan sosiegu, manera E ta duna boso, i nan tambe podera di e tera ku SENOR boso Dios ta duna nan. E ora ei boso mag bolbe na boso mes tera, i podera di loke Moises, sirbido di SENOR, a duna boso na e otro banda di Jordan, den direkshon di kaminda solo ta sali."

¹⁶I nan a kontesta Josue, bisando: "Tur loke bo a ordena nos, nos lo hasi, i unda ku bo manda nos, nos lo bai.

¹⁷Meskos ku nos a obedese Moises den tur kos, asina nos lo obedesebo; solamente, ku SENOR bo Dios sea ku bo, manera E tabata ku Moises.

¹⁸Ken ku rebeldia kontra bo ordu i no obedese bo palabranan den tur loke bo orden'e, mester wordu mata; solamente, sea fuerte i tene kurashi."