Read Papantla Totonac Josue 10 Bible Online

Josue 10 - Papantla Totonac bible

Josue 10

¹Awor a sosode ku ora Adonisedek, rei di Jerusalem, a tende ku Josue a kaptura Ai i a destrui esaki kompletamente (meskos ku el a hasi ku Jeriko i su rei, asina el a hasi ku Ai i su rei), i ku e habitantenan di Gabaon a hasi pas ku Israel i tabata den nan tera,

²el a hana masha miedu, pasobra Gabaon tabata un stat grandi, manera un di e statnan real, i pasobra e tabata mas grandi ku Ai, i tur su hombernan tabata poderoso.

³Pesei Adonisedek di Jerusalem a manda bisa Hoham, rei di Hebron, Piream, rei di Jarmut, Jafia, rei di Lakis, i Debir, rei di Eglon:

⁴"Bin serka mi i yudami, i laga nos ataka Gabaon, pasobra el a hasi pas ku Josue i ku e yunan di Israel."

⁵Pesei e sinku reinan di e amoreonan, rei di Jerusalem, rei di Hebron, rei di Jarmut, rei di Lakis i rei di Eglon, a reuni i a bai, nan ku tur nan ehersitonan, i a kampa pega ku Gabaon i a bringa kontra dje.

⁶E ora ei e hombernan di Gabaon a manda bisa Josue na e kampamentu di Gilgal: "No bandona bo sirbidonan; bin serka nos lihe i salba nos i yuda nos, pasobra tur e reinan di e amoreonan ku ta biba den e serunan a bin huntu kontra nos."

⁷Asina Josue a sali for di Gilgal, e ku tur e hendenan di guera huntu kune, i tur e guereronan balente.

⁸I SENOR a bisa Josue: "No tene miedu di nan, pasobra Mi a entrega nan den bo man; ni un di nan lo no keda para bo dilanti."

⁹Asina Josue a bin direpiente riba nan, komo ku el a marcha henter anochi for di Gilgal.

¹⁰I SENOR a konfundi nan dilanti di Israel, i El a mata nan den un gran matansa na Gabaon, i a persigui nan den direkshon di e subida di Bet-horon, i a mata nan te na Azeka i Makeda.

¹¹I a sosode ku ora nan tabata hui dilanti di Israel, mientras ku nan tabata na e bahada di Bet-horon, SENOR a tira piedra grandi for di shelu riba nan te na Azeka, i nan a muri; tabatin mas tantu ku a muri di e piedranan di hagel ku esnan ku e yunan di Israel a mata ku spada.

¹²E ora ei Josue a papia ku SENOR riba e dia ku SENOR a entrega e amoreonan dilanti di e yunan di Israel, i el a bisa den presensia di Israel: "Solo, keda para na Gabaon; i abo, luna, den e vaye di Ajalon."

¹³Asina solo a keda para, i luna a keda para, te ora ku e nashon a tuma vengansa riba su enemigunan. Esaki no ta para skirbi den e buki di Jaser? I solo a keda para meimei di shelu i no tabatin pura pa baha kasi henter un dia.

¹⁴I no tabatin un dia manera esei, ni prome ni despues, ku SENOR a skucha bos di un homber; pasobra SENOR a bringa pa Israel.

¹⁵E ora ei Josue, i henter Israel huntu kune, a bolbe bai na e kampamentu na Gilgal.

¹⁶Awor e sinku reinan aki a hui i a bai skonde den e kueba di Makeda.

¹⁷I Josue a wordu avisa, bisando: "E sinku reinan a wordu hana ta skonde den e kueba di Makeda."

¹⁸I Josue a bisa: "Lora piedranan grandi pone na boka di e kueba, i pone algun homber einan pa tene warda,

¹⁹ma boso mes no keda einan; persigui boso enemigunan i ataka nan den lomba. No laga nan drenta nan statnan, pasobra SENOR boso Dios a entrega nan den boso man."

²⁰I a sosode ku ora Josue i e yunan di Israel a kaba di mata nan den un matansa masha grandi mes, te ora nan a keda destrui, i e sobrebibientenan ku a keda a drenta e statnan fortifika,

²¹henter e pueblo a bolbe na pas na e kampamentu serka Josue na Makeda. Ningun hende no a papia ni un palabra kontra ningun di e yunan di Israel.

²²E ora ei Josue a bisa: "Habri boka di e kueba i trese e sinku reinan aki serka mi for di e kueba."

²³I asina nan a hasi, i a hiba e sinku reinan aki for di e kueba serka dje: rei di Jerusalem, rei di Hebron, rei di Jarmut, rei di Lakis i rei di Eglon.

²⁴I a sosode ku ora nan a hiba e reinan aki serka Josue, Josue a yama tur e hombernan di Israel, i a bisa e hefenan di e hombernan di guera ku a bai huntu kune: "Hala serka, pone boso pia riba nek di e reinan aki." Asina nan a hala serka i a pone nan pia riba nan nek.

²⁵E ora ei Josue a bisa nan: "No tene miedu ni desmaya! Sea fuerte i tene kurashi, pasobra asina SENOR lo hasi ku tur boso enemigunan kontra kendenan boso ta bringa."

²⁶Despues Josue a dal nan mata, i el a kologa nan na sinku palu; i nan a keda kologa na e palunan te anochi.

²⁷I a sosode ku ora solo tabata baha, Josue a duna ordu, i nan a baha nan for di e palunan i a tira nan den e kueba kaminda nan a bai skonde, i a pone piedranan grandi na boka di e kueba, te dia djawe.

²⁸Awor Josue a kaptura Makeda e dia ei i a dal e i su rei ku filo di spada; el a destruie kompletamente i tur hende ku tabata den dje. E no a laga ningun sobrebibiente. Asina el a hasi ku rei di Makeda meskos ku el a hasi ku rei di Jeriko.

²⁹E ora ei Josue, i henter Israel huntu kune, a pasa bai di Makeda pa Libna, i a bringa kontra Libna.

³⁰I SENOR a entrega esaki tambe den man di Israel, huntu ku su rei; i el a dal e i tur hende ku tabata biba den dje ku filo di spada. E no a laga ningun sobrebibiente den dje. Asina el a hasi ku su rei meskos ku el a hasi ku rei di Jeriko.

³¹I Josue, i henter Israel huntu kune, a pasa bai di Libna pa Lakis, i nan a kampa pega kune i a bringa kontra dje.

³²I SENOR a entrega Lakis den man di Israel; i el a kaptur'e riba e di dos dia, i a dal e, ku tur hende ku tabata den dje, ku filo di spada, meskos ku el a hasi ku Libna.

³³E ora ei Horam, rei di Gezer, a bin yuda Lakis, i Josue a derota e ku su pueblo te ora ku el a lagu'e sin ningun sobrebibiente.

³⁴I Josue, i henter Israel huntu kune, a pasa bai di Lakis pa Eglon, i nan a kampa pega kune i a bringa kontra

³⁵I nan a kaptur'e riba e dia ei i a dal e ku filo di spada; i e dia ei el a destrui tur hende ku tabata den dje kompletamente, meskos ku el a hasi ku Lakis.

³⁶E ora ei Josue, i henter Israel huntu kune, a bai for di Eglon pa Hebron, i nan a bringa kontra dje.

³⁷I nan a kaptur'e i a dal e, i su rei i tur su statnan i tur e hendenan ku tabata den dje, ku filo di spada. E no a laga ningun sobrebibiente, meskos ku el a hasi ku Eglon. I el a destrui e stat kompletamente i tur hende ku tabata den dje.

³⁸E ora ei Josue, i henter Israel huntu kune, a bolbe na Debir i nan a bringa kontra dje.

³⁹I el a kaptura e ku su rei i tur su statnan, i nan a dal nan ku filo di spada i a destrui tur hende ku tabatin einan kompletamente. E no a laga ningun sobrebibiente. Meskos ku el a hasi ku Hebron, asina el a hasi ku Debir i su rei, manera el a hasi tambe ku Libna i su rei.

⁴⁰Asina Josue a dal henter e tera, e serunan, Negev i e sabananan, e bahadanan i tur nan reinan. E no a laga ningun sobrebibiente, ma el a destrui kompletamente tur loke tabata hala rosea, meskos ku SENOR, e Dios di Israel, a ordena.

⁴¹I Josue a derota nan for di Kades-barnea te na Gaza, i henter e tera di Gosen te na Gabaon.

⁴²I Josue a kaptura tur e reinan aki i nan teranan den un solo biaha, pasobra SENOR, e Dios di Israel, a bringa pa Israel.

⁴³Asina Josue, i henter Israel huntu kune, a bolbe na e kampamentu na Gilgal.