Read Papantla Totonac Josue 11 Bible Online

Josue 11 - Papantla Totonac bible

Josue 11

¹E ora ei a sosode ku ora Jabin, rei di Hazor, a tende di esaki, el a manda rospondi pa Jobab, rei di Madon, i pa rei di Simron i pa rei di Aksaf,

²i pa e reinan di nort den e serunan i den Araba--pasuit di Kineret i den e sabananan i den e serunan haltu di Dor, pabou--

³pa e kananeo ku tabata pariba i pabou, i e amoreo i e heteo i e ferezeo i e jebuseo den e serunan, i e heveo na pia di Hermon na tera di Mizpa.

⁴I nan a sali, nan i tur nan ehersitonan huntu ku nan--mes tantu hende ku e santu ku tin kantu di laman, ku masha hopi kabai i garoshi.

⁵Asina tur e reinan aki ku a bai di akuerdo pa topa ku otro a bin kampa huntu na e awanan di Merom, pa bringa kontra Israel.

⁶E ora ei SENOR a bisa Josue: "No tene miedu pa nan motibu, pasobra manan, na e mesun ora aki lo Mi entrega nan tur morto dilanti di Israel; boso mester korta kabuya-di-pia di nan kabainan i kima nan garoshinan ku kandela."

⁷Asina Josue, i tur e hendenan di guera huntu kune, a bin direpiente riba nan banda di e awanan di Merom, i a ataka nan.

⁸I SENOR a entrega nan den man di Israel, asina ku nan a derota nan i a persigui nan te na Gran Sidon i Misrefot-maim i e vaye di Mizpa bai pariba; i nan a mata nan te ora no a keda ni un sobrebibiente.

⁹I Josue a hasi ku nan manera SENOR a bis'e; el a korta kabuya-di-pia di nan kabainan i a kima nan garoshinan ku kandela.

¹⁰E ora ei Josue a bira bai bek na e mesun tempu ei, i a kaptura Hazor, i a dal su rei ku spada, pasobra antes Hazor tabata kabes di tur e reinonan aki.

¹¹I nan a dal tur hende ku tabata den dje ku filo di spada, i a destrui nan kompletamente; no a keda nada ku tabata hala rosea. I el a kima Hazor ku kandela.

¹²I Josue a kaptura tur e statnan di e reinan aki i tur nan reinan, i el a dal nan ku filo di spada, i a destrui nan kompletamente, meskos ku Moises, e sirbido di SENOR, a ordena.

¹³Sinembargo, ningun di e statnan, ku tabata keda riba nan serunan, Israel no a kima, ku eksepshon di Hazor, ku Josue a kima.

¹⁴I henter e botin di e statnan aki, i e bestianan, e yunan di Israel a kohe pa nan mes; ma nan a dal tur hende ku filo di spada, te ora nan a destrui nan. Nan no a laga nada ku tabata hala rosea.

¹⁵Meskos ku SENOR a ordena Su sirbido Moises, asina Moises a ordena Josue, i asina Josue a hasi; e no a keda sin hasi nada di tur loke SENOR a ordena Moises.

¹⁶Asina Josue a kohe henter e tera ei: e serunan i henter Negev, henter e tera ei di Gosen, e sabananan, Araba, e serunan di Israel ku su sabananan

¹⁷for di Seru Halak, ku ta subi bai den direkshon di Seir, te na Baal-gad den e vaye di Libano, na pia di Seru Hermon. I el a kaptura tur nan reinan i a dal nan mata.

¹⁸Josue a hasi guera pa hopi tempu ku tur e reinan aki.

¹⁹No tabatin ni un stat ku a hasi pas ku e yunan di Israel, ku eksepshon di e heveonan ku tabata biba na Gabaon; nan a kohe nan tur den bataya.

²⁰Pasobra esaki a bin di SENOR pa hasi nan kurason duru, pa sali kontra Israel den bataya, pa e por a destrui nan kompletamente, pa nan no hana miserikordia, ma pa e por a destrui nan, meskos ku SENOR a ordena Moises.

²¹Anto Josue a bin e tempu ei i a kaba ku e anakeonan for di e serunan, for di Hebron, for di Debir, for di Anab, for di tur e serunan di Juda i for di tur e serunan di Israel. Josue a destrui nan ku nan statnan kompletamente.

²²No a keda ni un anakeo den e tera di e yunan di Israel; solamente na Gaza, na Gat i na Asdod a keda algun.

²³Asina Josue a kohe henter e tera, konforme tur loke SENOR a papia ku Moises; i Josue a entregu'e na Israel komo erensia, segun nan divishonnan, segun nan tribunan. Asina e tera a deskansa di guera.