Read Papantla Totonac Josue 14 Bible Online

Josue 14 - Papantla Totonac bible

Josue 14

¹Awor esakinan ta e teritorionan ku e yunan di Israel a ereda na tera di Kanaan, ku saserdote Eleazar i Josue, yu homber di Nun, i e kabesnan di e kasnan di e tribunan di e yunan di Israel a parti entre nan komo erensia,

²segun e lot di nan erensia, manera SENOR a ordena pa medio di Moises, pa e nuebe tribunan i e mitar tribu.

³Pasobra Moises a duna e dos tribunan i e mitar tribu erensia na e otro banda di Jordan, ma e no a duna erensia na e levitanan meimei di nan.

⁴Pasobra e yu hombernan di Jose tabata dos tribu, Manases i Efrain, i nan no a duna un parti na e levitanan den e tera, sino solamente statnan pa biba aden, ku nan luganan di yerba berde pa nan bestianan di kria i nan propiedat.

⁵Asina e yunan di Israel a hasi meskos ku SENOR a ordena Moises, i nan a parti e tera.

⁶E ora ei e yu hombernan di Juda a bin serka Josue na Gilgal, i Kaleb, yu homber di Jefone e kenezeo, a bis'e: "Bo ta korda e palabra ku SENOR a papia ku Moises, e homber di Dios, tokante di abo i ami na Kades-barnea.

⁷Mi tabatin kuarenta ana tempu ku Moises, e sirbido di SENOR, a mandami for di Kades-barnea pa spiona e tera, i mi a bolbe bek ku notisia p'e, manera mi tabata sinti esaki den mi kurason.

⁸Sinembargo, mi rumannan ku a bai ku mi a pone kurason di e pueblo dirti di miedu; ma ami a sigui SENOR mi Dios kompletamente.

⁹Asina Moises a hura e dia ei, bisando: 'Siguramente e tera ku bo pia a trapa lo ta un erensia pa bo i pa bo yunan pa semper, pasobra bo a sigui SENOR mi Dios kompletamente.'

¹⁰"I awor, mira, SENOR a lagami biba, manera El a bisa, e kuarent'i sinku ananan aki, for di tempu ku SENOR a papia e palabra aki ku Moises, tempu ku Israel tabata kana den desierto; i awor, mira, awe mi tin ochent'i sinku ana.

¹¹Awe mi ta mes fuerte ainda ku dia Moises a mandami; manera mi forsa tabata e tempu ei, asina mi forsa ta awor aki, pa bai guera i pa sali i pa drenta.

¹²Pesei anto, dunami e serunan aki ku SENOR a papia di dje e dia ei, pasobra bo a tende e dia ei ku e anakeonan tabata ayanan, ku statnan grandi i fortifika; podise SENOR lo ta ku mi, i lo mi kore ku nan manera SENOR a papia."

¹³Asina Josue a bendishon'e, i a duna Kaleb, yu homber di Jefone, Hebron komo erensia.

¹⁴Pesei Hebron a bira e erensia di Kaleb, yu homber di Jefone e kenezeo, te dia djawe, pasobra el a sigui SENOR Dios di Israel kompletamente.

¹⁵Awor antes nomber di Hebron tabata Kiriat-arba; pasobra Arba tabata e homber di mas grandi entre e anakeonan. I e tera a sosega, pasobra no tabatin guera mas.