Read Papantla Totonac Josue 17 Bible Online

Josue 17 - Papantla Totonac bible

Josue 17

¹Awor esaki tabata e lot pa e tribu di Manases, pasobra e tabata e primogenito di Jose. Galaad i Basan a wordu duna na Makir, e primogenito di Manases, tata di Galaad, pasobra e tabata un homber di guera.

²Asina a tira lot pa e restu di e yu hombernan di Manases, segun nan famianan: pa e yu hombernan di Abiezer i pa e yu hombernan di Helek i pa e yu hombernan di Asriel i pa e yu hombernan di Sikem i pa e yu hombernan di Hefer i pa e yu hombernan di Semida; esakinan tabata e desendientenan homber di Manases, yu homber di Jose segun nan famianan.

³Sinembargo, Zelofehad, yu homber di Hefer, yu homber di Galaad, yu homber di Makir, yu homber di Manases, no tabatin yu homber, sino solamente yu muhe; i esakinan ta nomber di su yu muhenan: Maala i Noa, Hogla, Milka i Tirsa.

⁴I nan a bin dilanti di saserdote Eleazar i dilanti di Josue, yu homber di Nun, i dilanti di e lidernan, bisando: "SENOR a ordena Moises pa duna nos un erensia meimei di nos ruman hombernan." Pesei, konforme e ordu di SENOR, el a duna nan un erensia meimei di e ruman hombernan di nan tata.

⁵Asina e dies partinan a toka Manases, fuera di tera di Galaad i Basan, ku ta keda na e otro banda di Jordan,

⁶pasobra e yu muhenan di Manases a risibi un erensia entre su yu hombernan. I tera di Galaad tabata pertenese na e otro yu hombernan di Manases.

⁷I e frontera di Manases tabata kore di Aser pa Mikmetat, ku tabata keda pariba di Sikem; anto e frontera tabata bai suit na e habitantenan di En-tapua.

⁸E tera di Tapua tabata pertenese na Manases, ma Tapua na frontera di Manases tabata pertenese na e yu hombernan di Efrain.

⁹I e frontera tabata baha bai na e roi di Kana, pasuit di e roi (e statnan aki tabata pertenese na Efrain meimei di e statnan di Manases), i e frontera di Manases tabata keda na e parti panort di e roi, i e tabata kaba na laman.

¹⁰E banda pasuit tabata pertenese na Efrain i e banda panort, na Manases, i e laman tabata nan frontera; i parti panort nan tabata yega te na Aser, i parti pariba te na Isakar.

¹¹Anto na Isakar i na Aser, Manases tabatin Bet-sean ku su statnan i Ibleam ku su statnan, i e habitantenan di Dor ku su statnan, i e habitantenan di Endor ku su statnan, i e habitantenan di Taanak ku su statnan, i e habitantenan di Meguido ku su statnan--esun di tres ta Nafet.

¹²Ma e yu hombernan di Manases no por a podera di e statnan aki, pasobra e kananeonan tabata determina pa keda biba na e tera ei.

¹³I a sosode ku ora e yunan di Israel a bira fuerte, nan a pone e kananeonan hasi trabou forsa, ma nan no a kore ku nan kompletamente.

¹⁴E ora ei e yu hombernan di Jose a papia ku Josue, bisando: "Pakiko bo a dunami solamente un lot i un porshon komo erensia, siendo ku mi ta un pueblo numeroso ku SENOR a bendishona te asina leu?"

¹⁵I Josue a kontesta nan: "Si boso ta un pueblo numeroso, bai den mondi-sera i habri un luga pa boso mes ayanan den e tera di e ferezeonan i di e refaitanan, komo ku e serunan di Efrain ta muchu perta pa boso."

¹⁶I e yu hombernan di Jose a bisa: "E serunan no ta basta pa nos, i tur e kananeonan ku ta biba den e vaye tin garoshi di heru, tantu esnan ku ta na Bet-sean ku su statnan komo esnan ku ta den e vaye di Jezreel."

¹⁷I Josue a papia ku e kas di Jose, ku Efrain i Manases, bisando: "Bo ta un pueblo numeroso i bo tin gran poder; lo bo no tin un lot so,

¹⁸ma e serunan lo ta di bo. Pasobra ounke ku e ta un mondi-sera, lo bo habrie i te na su fronteranan di mas leu e lo ta di bo; pasobra lo bo kore ku e kananeonan, maske nan tin garoshi di heru i maske nan ta fuerte."