Read Papantla Totonac Josue 18 Bible Online

Josue 18 - Papantla Totonac bible

Josue 18

¹E ora ei henter e kongregashon di e yunan di Israel a reuni na Silo, i a lanta e tent di reunion ayanan; i e tera a keda someti nan dilanti.

²I di e yunan di Israel a keda shete tribu ku no a hana nan erensia ainda.

³Pesei Josue a bisa e yunan di Israel: "Kuantu tempu mas boso lo neglisha di drenta i podera di e tera ku SENOR, e Dios di boso tatanan, a duna boso?

⁴Apunta entre boso tres homber di kada tribu pa mi manda nan, i pa nan lanta i kana dor di e tera i skirbi un deskripshon di dje segun nan erensia; e ora ei nan lo bolbe serka mi.

⁵I nan lo dividi esaki den shete porshon; Juda mester keda den su teritorio parti pasuit, i kas di Jose mester keda den nan teritorio parti panort.

⁶I despues ku boso a skirbi e deskripshon di e shete divishonnan di e tera, trese nan aki pa mi. I lo mi tira lot pa boso aki dilanti di SENOR nos Dios.

⁷Pasobra e levitanan no tin porshon meimei di boso, komo ku e saserdosio di SENOR ta nan erensia. Gad i Ruben i e mitar tribu di Manases tambe a risibi nan erensia na e otro banda di Jordan, parti pariba, lokual Moises, e sirbido di SENOR, a duna nan."

⁸E ora ei e hombernan a lanta bai, i Josue a ordena esnan ku a bai pa deskribi e tera, bisando: "Bai i kana dor di e tera i deskribie, i bolbe serka mi; e ora ei lo mi tira lot pa boso aki dilanti di SENOR na Silo."

⁹Asina e hombernan a bai i a pasa dor di e tera i a deskribie, stat pa stat, den shete divishon den un buki; i nan a bin serka Josue na e kampamentu na Silo.

¹⁰I Josue a tira lot pa nan na Silo dilanti di SENOR, i ayanan Josue a dividi e tera pa e yunan di Israel segun nan divishonnan.

¹¹Awor e lot di e tribu di e yu hombernan di Benjamin a sali segun nan famianan, i e teritorio di nan lot tabata entre e yu hombernan di Juda i e yu hombernan di Jose.

¹²I nan frontera banda panort tabata for di Jordan, anto e frontera tabata subi bai banda di Jeriko parti panort, i tabata subi bai pabou dor di e serunan, i tabata kaba na e mondi di Bet-aven.

¹³I for di einan e frontera tabata sigui bai Luz, banda di Luz (esta, Bet-el) bai suit; i e frontera tabata baha bai Atarot-adar, pega ku e seru ku ta keda parti pasuit di Bet-horon-abou.

¹⁴I e frontera tabata sigui for di ayanan, i tabata bira banda pabou bai suit, for di e seru ku ta keda dilanti di Bet-horon bai suit; i e tabata kaba na Kiriat-baal (esta, Kiriat-jearim), un stat di e yu hombernan di Juda. Esaki tabata e banda pabou.

¹⁵Anto e banda pasuit tabata for di e rant di Kiriat-jearim, i e frontera tabata bai pabou i tabata bai na e fuente di e awanan di Neftoa.

¹⁶I e frontera tabata baha bai na pia di e seru ku ta keda den e vaye di Ben-hinom, ku ta keda den e vaye di Refaim bai nort; i e tabata baha bai na e vaye di Hinom, na e bahada di e jebuseo bai suit i baha bai En-rogel.

¹⁷Anto e tabata sigui bai nort i tabata bai En-semes i sigui bai Gelilot, ku ta keda enfrente di e subida di Adumin, i e tabata baha bai na e piedra di Bohan, yu homber di Ruben.

¹⁸I e tabata sigui bai na e banda ku ta keda enfrente di Araba bai nort, i tabata baha bai Araba.

¹⁹I e frontera tabata sigui bai banda di Bet-hogla bai nort; i e frontera tabata kaba na e bahia ku ta keda panort di Laman Salu, na e punta suit di Jordan. Esaki tabata e frontera pasuit.

²⁰Ademas, Jordan tabata su frontera banda pariba. Esaki tabata e erensia di e yu hombernan di Benjamin segun nan famianan i segun su fronteranan tur ront.

²¹Awor e statnan di e tribu di e yu hombernan di Benjamin, segun nan famianan, tabata: Jeriko, Bet-hogla i Emek-kasis,

²²Bet-araba, Zemaraim, Bet-el,

²³Avim, Para, Ofra,

²⁴Kefar-haamoni, Ofni i Geba; diesdos stat ku nan pueblitonan.

²⁵Gabaon, Rama, Beerot,

²⁶Mizpa, Kafira, Mozah,

²⁷Rekem, Irpeel, Tarala,

²⁸Zela, Elef, i Jebus (esta, Jerusalem), Gabaa, Kiriat; dieskuater stat ku nan pueblitonan. Esaki ta e erensia di e yu hombernan di Benjamin segun nan famianan.