Read Papantla Totonac Josue 2 Bible Online

Josue 2 - Papantla Totonac bible

Josue 2

¹E ora ei Josue, yu homber di Nun, a manda dos spion na sekreto for di Sitim, bisando: "Bai wak e tera, spesialmente Jeriko." Asina nan a bai i a drenta kas di un prostituta ku tabata yama Rahab, i a hospeda ayanan.

²I rei di Jeriko a wordu avisa: "Mira, hombernan di e yunan di Israel a bin aki awe nochi pa spiona e tera."

³I rei di Jeriko a manda bisa Rahab: "E hombernan ku a bin serka bo, ku a drenta den bo kas, saka nan afo, pasobra nan a bin pa spiona henter e tera."

⁴Ma e muhe a tuma e dos hombernan i a skonde nan, i el a bisa: "Si, e hombernan a bin serka mi, ma mi no tabata sa di unda nan tabata.

⁵I a sosode ku ora a bira skur i a yega tempu pa sera porta di stat, e hombernan a sali bai; mi no sa unda e hombernan a bai. Bai lihe nan tras, i boso lo alkansa nan."

⁶Ma ta riba dak el a hiba nan i a skonde nan den e stengelnan di lino ku el a pone riba dak.

⁷Asina e hombernan a bai persigui nan riba e kaminda pa Jordan te na e vadonan di e riu; i asina ku esnan ku tabata persigui nan a sali bai, nan a sera porta di stat.

⁸Awor prome ku nan a bai drumi, e muhe a subi bin serka nan riba dak,

⁹i a bisa e hombernan: "Mi sa ku SENOR a duna boso e tera i ku teror pa boso a kai riba nos, i ku tur e habitantenan di e tera a desmaya pa boso motibu.

¹⁰Pasobra nos a tende kon SENOR a seka e awa di Laman Kora boso dilanti, ora boso a sali for di Egipto, i kiko boso a hasi ku e dos reinan di e amoreonan ku tabata na e otro banda di Jordan, ku Sehon i Og, kendenan boso a destrui kompletamente.

¹¹I ora nos a tende esaki, nos kurason a dirti, i pa boso motibu ningun hende no tabatin kurashi mas; pasobra SENOR boso Dios, E ta Dios ariba den shelu i abou na tera.

¹²Pesei anto, pa fabor, hurami pa SENOR, komo ku mi a trata boso bon, ku boso tambe lo trata e hendenan di kas di mi tata bon, i dunami un garantia di fieldat,

¹³i spar bida di mi tata i mi mama i mi ruman hombernan i mi ruman muhenan, huntu ku tur esnan ku ta pertenese na nan, i libra nos bida for di morto."

¹⁴E ora ei e hombernan a bis'e: "Nos bida pa boso bida basta boso no konta di e asunto di nos aki; i lo sosode ku ora SENOR duna nos e tera, nos lo tratabo ku miserikordia i berdat."

¹⁵E ora ei el a laga nan baha na un kabuya dor di e bentana, pasobra su kas tabata keda riba e muraya di stat, asina ku e tabata biba riba e muraya.

¹⁶I el a bisa nan: "Bai den e serunan, pa esnan ku ta persigui boso no hana boso, i skonde ayanan pa tres dia, te ora ku esnan ku ta persigui boso bin bek. Despues boso por sigui boso kaminda."

¹⁷I e hombernan a bis'e: "Nos lo ta liber di e huramentu aki na bo, ku bo a pone nos hura,

¹⁸a menos ku ora nos bin den e tera, bo mara e kordon di hilu skarlata aki na e bentana dor di kual bo a laga nos baha, i reuni serka bo den bo kas, bo tata i bo mama i bo rumannan i tur hende di kas di bo tata.

¹⁹I lo sosode ku ken ku sali for di e portanan di bo kas bai riba kaya, su sanger lo ta riba su mes kabes, i nos lo ta liber; ma ken ku ta serka bo den kas, su sanger lo ta riba nos kabes, si un man wordu poni riba dje.

²⁰Ma si bo konta di e asunto di nos aki, e ora ei nos lo ta liber di e huramentu ku bo a hasi nos hura."

²¹I el a bisa: "Konforme bo palabranan, asina lo ta." Asina el a manda nan bai, i nan a bai; i el a mara e kordon skarlata na e bentana.

²²I nan a bai i a yega na e serunan, i a keda einan tres dia te ora ku esnan ku tabata persigui nan a bai bek. Awor esnan ku tabata persigui nan a buska nan henter kaminda, ma no a hana nan.

²³E ora ei e dos hombernan a bin bek i a baha for di e serunan i a krusa i a bin serka Josue, yu homber di Nun, i nan a kont'e tur loke a pasa ku nan.

²⁴I nan a bisa Josue: "Siguramente SENOR a entrega henter e tera den nos man, i ademas, tur e habitantenan di e tera a desmaya pa nos motibu."