Read Papantla Totonac Josue 20 Bible Online

Josue 20 - Papantla Totonac bible

Josue 20

¹E ora ei SENOR a papia ku Josue, bisando:

²"Papia ku e yunan di Israel, bisando: 'Apunta e statnan di refugio, di kualnan Mi a papia ku boso pa medio di Moises,

³pa e matado ku mata un hende no intenshonalmente, sin premeditashon, por hui bai ayanan, i nan lo bira boso refugio kontra e vengado di sanger.

⁴'I e mester hui bai na un di e statnan aki, i para na entrada di e porta di stat, i splika su kaso pa e ansianonan di e stat ei tende; i nan mester tum'e den e stat serka nan i dun'e un luga, asina ku e por keda biba meimei di nan.

⁵Awor si e vengado di sanger persiguie, e ora ei nan no mester entrega e matado den su man, pasobra el a mata su prohimo sin premeditashon, sin ku antes e tabatin odio kontra dje.

⁶I e mester keda biba den e stat ei te ora ku e presenta dilanti di e kongregashon pa huisio, te na morto di esun ku ta sumosaserdote den e dianan ei. E ora ei e matado mester bolbe bai na su mes stat i na su mes kas, na e stat for di kual el a hui.'"

⁷Asina nan a aparta Kedes na Galilea den e serunan di Neftali i Sikem den e serunan di Efrain i Kiriat-arba (esta, Hebron) den e serunan di Juda.

⁸I na e otro banda di Jordan, pariba di Jeriko, nan a apunta Beser den desierto, den e sabana for di e tribu di Ruben, i Ramot na Galaad for di e tribu di Gad, i Golan na Basan for di e tribu di Manases.

⁹Esakinan tabata e statnan ku a wordu apunta pa tur e yunan di Israel i pa e stranhero ku ta keda biba pa un tempu meimei di nan, pa ken ku mata un hende no intenshonalmente por hui bai ayanan, i no muri na man di e vengado di sanger te ora ku e presenta dilanti di e kongregashon.