Read Papantla Totonac Josue 21 Bible Online

Josue 21 - Papantla Totonac bible

Josue 21

¹E ora ei e kabesnan di e kasnan di e levitanan a bin serka saserdote Eleazar i Josue, yu homber di Nun, i e kabesnan di e kasnan di e tribunan di e yunan di Israel.

²I nan a papia ku nan na Silo na tera di Kanaan, bisando: "SENOR a ordena pa medio di Moises pa duna nos statnan pa biba aden, ku nan luganan di yerba berde pa nos bestianan."

³Asina e yunan di Israel a duna e levitanan e statnan aki ku nan luganan di yerba berde for di nan erensia, konforme e ordu di SENOR.

⁴Despues e lot a sali pa e famianan di e koatitanan. I e yu hombernan di saserdote Aaron, kendenan tabata di e levitanan, a risibi diestres stat pa medio di lot for di e tribu di Juda i for di e tribu di Simeon i for di e tribu di Benjamin.

⁵I e restu di e yu hombernan di Koat a risibi dies stat pa medio di lot for di e famianan di e tribu di Efrain, i for di e tribu di Dan i for di e mitar tribu di Manases.

⁶I e yu hombernan di Gerson a risibi diestres stat pa medio di lot for di e famianan di e tribu di Isakar i for di e tribu di Aser i for di e tribu di Neftali i for di e mitar tribu di Manases na Basan.

⁷E yu hombernan di Merari, segun nan famianan, a risibi diesdos stat for di e tribu di Ruben i for di e tribu di Gad i for di e tribu di Zabulon.

⁸Awor pa medio di lot e yunan di Israel a duna e levitanan e statnan aki ku nan luganan di yerba berde, manera SENOR a ordena pa medio di Moises.

⁹I for di e tribu di e yu hombernan di Juda i for di e tribu di e yu hombernan di Simeon nan a duna e statnan aki ku ta wordu menshona pa nomber;

¹⁰i nan tabata pa e yu hombernan di Aaron, un di e famianan di e koatitanan, di e yu hombernan di Levi, pasobra e lot tabata di nan prome.

¹¹Asina nan a duna nan Kiriat-arba, Arba tabata tata di Anak (esta, Hebron), den e serunan di Juda, ku su luganan di yerba berde ront di dje.

¹²Ma e kunukunan di e stat i su pueblitonan nan a duna Kaleb, yu homber di Jefone, komo su propiedat.

¹³Asina nan a duna e yu hombernan di saserdote Aaron, Hebron, e stat di refugio pa e matado, ku su luganan di yerba berde, i Libna ku su luganan di yerba berde,

¹⁴i Jatir ku su luganan di yerba berde i Estemoa ku su luganan di yerba berde,

¹⁵i Holon ku su luganan di yerba berde i Debir ku su luganan di yerba berde,

¹⁶i Ain ku su luganan di yerba berde, i Juta ku su luganan di yerba berde i Bet-semes ku su luganan di yerba berde; nuebe stat for di e dos tribunan aki.

¹⁷I for di e tribu di Benjamin: Gabaon ku su luganan di yerba berde, Geba ku su luganan di yerba berde,

¹⁸Anatot ku su luganan di yerba berde i Almon ku su luganan di yerba berde; kuater stat.

¹⁹Tur e statnan di e yu hombernan di Aaron, e saserdotenan, tabata diestres stat ku nan luganan di yerba berde.

²⁰Despues, pa medio di lot, e statnan for di e tribu di Efrain a wordu parti entre e famianan di e yu hombernan di Koat, e levitanan, esta entre e restu di e yu hombernan di Koat.

²¹I nan a duna nan Sikem, e stat di refugio pa e matado, ku su luganan di yerba berde, den e serunan di Efrain, i Gezer ku su luganan di yerba berde,

²²i Kibsaim ku su luganan di yerba berde, i Bet-horon ku su luganan di yerba berde; kuater stat.

²³I for di e tribu di Dan: Elteke ku su luganan di yerba berde, Gibeton ku su luganan di yerba berde,

²⁴Ajalon ku su luganan di yerba berde, Gat-rimon ku su luganan di yerba berde; kuater stat.

²⁵I for di e mitar tribu di Manases nan a duna Taanak ku su luganan di yerba berde i Gat-rimon ku su luganan di yerba berde; dos stat.

²⁶Tur e statnan ku nan luganan di yerba berde pa e famianan di e restu di e yu hombernan di Koat tabata dies.

²⁷I e yu hombernan di Gerson, un di e famianan di e levitanan, nan a duna for di e mitar tribu di Manases: Golan na Basan, e stat di refugio pa e matado, ku su luganan di yerba berde, i Beestera ku su luganan di yerba berde; dos stat.

²⁸I for di e tribu di Isakar: Kison ku su luganan di yerba berde, Daberat ku su luganan di yerba berde,

²⁹Jarmut ku su luganan di yerba berde, En-ganim ku su luganan di yerba berde; kuater stat.

³⁰I for di e tribu di Aser: Miseal ku su luganan di yerba berde, Abdon ku su luganan di yerba berde,

³¹Helkat ku su luganan di yerba berde, i Rehob ku su luganan di yerba berde; kuater stat.

³²I for di e tribu di Neftali: Kedes na Galilea, e stat di refugio pa e matado, ku su luganan di yerba berde i Hamot-dor ku su luganan di yerba berde i Kartan ku su luganan di yerba berde; tres stat.

³³Tur e statnan di e gersonitanan, segun nan famianan, tabata diestres stat ku nan luganan di yerba berde.

³⁴I na e famianan di e yu hombernan di Merari, e restu di e levitanan, nan a duna for di e tribu di Zabulon: Jokneam ku su luganan di yerba berde i Karta ku su luganan di yerba berde,

³⁵Dimna ku su luganan di yerba berde, Naalal ku su luganan di yerba berde; kuater stat.

³⁶I for di e tribu di Ruben: Beser ku su luganan di yerba berde i Jahaza ku su luganan di yerba berde,

³⁷Kademot ku su luganan di yerba berde i Mefaat ku su luganan di yerba berde; kuater stat.

³⁸I for di e tribu di Gad: Ramot na Galaad, e stat di refugio pa e matado, ku su luganan di yerba berde, Mahanaim ku su luganan di yerba berde,

³⁹Hesbon ku su luganan di yerba berde, Jazer ku su luganan di yerba berde; kuater stat na tur.

⁴⁰Tur esakinan tabata e statnan di e yu hombernan di Merari segun nan famianan, e restu di e famianan di e levitanan, i nan lot tabata diesdos stat.

⁴¹Tur e statnan di e levitanan meimei di e propiedat di e yunan di Israel tabata kuarent'i ocho stat ku nan luganan di yerba berde.

⁴²Kada un di e statnan aki tabatin su luganan di yerba berde ront di dje; asina tabata ku tur e statnan aki.

⁴³Asina SENOR a duna Israel henter e tera ku El a hura di duna nan tatanan, i nan a podera di dje i a biba den dje.

⁴⁴I SENOR a duna nan sosiegu na tur banda, konforme tur loke El a hura na nan tatanan i ni un di tur nan enemigunan no por a para nan dilanti; SENOR a entrega tur nan enemigunan den nan man.

⁴⁵Ni un di e bon promesanan ku SENOR a hasi na e kas di Israel no a faya; tur a keda kumpli.