Read Papantla Totonac Josue 22 Bible Online

Josue 22 - Papantla Totonac bible

Josue 22

¹E ora ei Josue a manda yama e rubenitanan i e gaditanan i e mitar tribu di Manases,

²i a bisa nan: "Boso a kumpli ku tur loke Moises, e sirbido di SENOR, a ordena boso, i a skucha mi bos den tur kos ku mi a ordena boso.

³Boso no a bandona boso rumannan durante di e tempu largu aki te dia djawe, ma a kumpli ku e mandamentu di SENOR boso Dios.

⁴I awor SENOR boso Dios a duna boso rumannan sosiegu, manera El a bisa nan; pesei, bolbe awor i bai na boso tentnan, na e tera ku ta boso propiedat, ku Moises, e sirbido di SENOR, a duna boso na e otro banda di Jordan.

⁵Solamente, tene hopi kuidou pa kumpli ku e mandamentu i e lei ku Moises, e sirbido di SENOR, a ordena boso, di stima SENOR boso Dios i kana den tur Su kamindanan i warda Su mandamentunan i tene duru na djé, i sirbié ku henter boso kurason i ku henter boso alma."

⁶Asina Josue a bendishona nan i a manda nan bai, i nan a bai na nan tentnan.

⁷Awor na esun mitar tribu di Manases Moises a duna un propiedat na Basan, ma na e otro mitar Josue a duna un propiedat meimei di nan rumannan, parti pabou na e otro banda di Jordan. Asina ta ku ora Josue a manda nan bai na nan tentnan, el a bendishona nan,

⁸i a bisa nan: "Bolbe na boso tentnan ku gran rikesa i ku masha hopi bestia di kria, ku plata, oro, brons, heru, i ku masha hopi pana; parti e botin di boso enemigunan ku boso rumannan."

⁹I e yu hombernan di Ruben i e yu hombernan di Gad i e mitar tribu di Manases a bolbe kas i a bai for di e yunan di Israel na Silo ku ta keda na tera di Kanaan, pa bai tera di Galaad, e tera ku nan a hana komo nan propiedat, kual nan a podera di dje, konforme e ordu di SENOR pa medio di Moises.

¹⁰I ora nan a yega na e region di Jordan ku ta keda na tera di Kanaan, e yu hombernan di Ruben i e yu hombernan di Gad i e mitar tribu di Manases a traha un altar ayanan, banda di Jordan, un altar grandi, impreshonante.

¹¹I e yunan di Israel a tende nan bisa: "Mira, e yu hombernan di Ruben i e yu hombernan di Gad i e mitar tribu di Manases a traha un altar na frontera di tera di Kanaan, den e region di Jordan, na e parti ku ta pertenese na e yunan di Israel."

¹²I ora ku e yunan di Israel a tende esaki, henter e kongregashon di e yunan di Israel a reuni na Silo pa bai bringa kontra nan.

¹³E ora ei e yunan di Israel a manda Finees, yu homber di saserdote Eleazar, serka e yu hombernan di Ruben i e yu hombernan di Gad i e mitar tribu di Manases, na tera di Galaad,

¹⁴i huntu kune dies hefe, un hefe pa kada kas di famia di kada un di e tribunan di Israel; i kada un di nan tabata kabes di kas di su tata meimei di e milnan di Israel.

¹⁵I nan a bin serka e yu hombernan di Ruben i serka e yu hombernan di Gad i serka e mitar tribu di Manases, na tera di Galaad, i nan a papia ku nan, bisando:

¹⁶"Asina henter e kongregashon di SENOR ta bisa: 'Ta kiko e akto infiel aki ta ku boso a komete kontra e Dios di Israel, ku awe boso a bira bai i a stop di sigui SENOR dor di traha pa boso mes un altar, pa rebeldia awe kontra SENOR?

¹⁷E inikidat di Peor no ta basta pa nos, di kual nos no a limpia nos mes te dia djawe, i pa motibu di kual un plaga a bin riba e kongregashon di SENOR,

¹⁸ku awe boso mester bira bai i stop di sigui SENOR? 'I lo sosode ku si boso rebeldia kontra SENOR awe, manan E lo rabia ku henter e kongregashon di Israel.

¹⁹Sinembargo, si e tera ku ta boso propiedat ta impuru, anto krusa bin na e tera ku ta propiedat di SENOR, kaminda e tabernakel di SENOR ta keda, i tuma propiedat meimei di nos. Solamente, no rebeldia kontra SENOR, ni rebeldia kontra nos dor di traha un altar pa boso mes, fuera di e altar di SENOR nos Dios.

²⁰No t'asina ku Akan, yu homber di Zera, a aktua infielmente pa ku e kosnan bou di maldishon, i ku furia a baha riba henter e kongregashon di Israel? I e homber ei no a perese su so den su inikidat.'"

²¹E ora ei e yu hombernan di Ruben i e yu hombernan di Gad i e mitar tribu di Manases a kontesta i a papia ku e kabesnan di e famianan di Israel:

²²"Esun Poderoso, Dios, e SENOR, Esun Poderoso, Dios, e SENOR! E sa, i mara Israel por sa. Si tabata den rebeldia of den un akto infiel kontra SENOR, Abo SENOR, no salba nos awe!

²³Si nos a traha pa nos mes un altar pa bira lomba pa e kaminda di SENOR, of pa ofrese riba dje un ofrenda kima of un ofrenda di mainshi, of pa ofrese sakrifisionan di ofrendanan di pas riba dje, ku SENOR mes pidi nos kuenta di esaki.

²⁴"Ma mas bien nos a hasi esaki dor di preokupashon, pa un motibu, i nos a bisa: 'Den futuro boso yu hombernan por bisa nos yu hombernan: "Kiko boso tin di aber ku SENOR, e Dios di Israel?

²⁵Pasobra SENOR a hasi Jordan un frontera entre nos i boso, yu hombernan di Ruben i yu hombernan di Gad; boso no tin porshon den SENOR." Asina boso yu hombernan por pone nos yu hombernan stop di teme SENOR.'

²⁶"Pesei nos a bisa: 'Laga nos traha un altar, no pa ofrenda kima, ni pa sakrifisio;

²⁷mas bien e lo ta un testigu entre nos i boso i entre nos generashonnan despues di nos, pa nos por hasi e sirbishi di SENOR dilanti di djé ku nos ofrendanan kima, i ku nos sakrifisionan i ku nos ofrendanan di pas, pa boso yu hombernan no por bisa nos yu hombernan den futuro: "Boso no tin porshon den SENOR."'

²⁸"Pesei nos a bisa: 'Lo sosode tambe ku si den futuro nan bisa nos of nos generashonnan esaki, e ora ei nos lo bisa: "Mira e kopia di e altar di SENOR ku nos tatanan a traha, no pa ofrenda kima ni pa sakrifisio; mas bien e ta un testigu entre nos i boso."'

²⁹"Leu sea di nos di rebeldia kontra SENOR i bira bai i stop di sigui SENOR awe dor di traha un altar pa ofrenda kima, pa ofrenda di mainshi of pa sakrifisio, fuera di e altar di SENOR nos Dios ku ta keda dilanti di Su tabernakel."

³⁰Ora saserdote Finees, e lidernan di e kongregashon i e kabesnan di e famianan di Israel ku tabata huntu kune, a tende e palabranan ku e yu hombernan di Ruben, e yu hombernan di Gad i e yu hombernan di Manases a papia, esaki a agrada nan.

³¹I Finees, yu homber di saserdote Eleazar, a bisa e yu hombernan di Ruben, e yu hombernan di Gad i e yu hombernan di Manases: "Awe nos sa ku SENOR ta meimei di nos, pasobra boso no a komete e akto infiel aki kontra SENOR; awor boso a libra e yunan di Israel for di e man di SENOR."

³²E ora ei Finees, yu homber di saserdote Eleazar, i e lidernan a bai bek for di e yu hombernan di Ruben i for di e yu hombernan di Gad, for di tera di Galaad, na tera di Kanaan, serka e yunan di Israel, i a hiba rospondi pa nan.

³³I e rospondi a agrada e yunan di Israel, i e yunan di Israel a bendishona Dios; i nan no a papia mas di bai bringa kontra nan, pa destrui e tera kaminda e yu hombernan di Ruben i e yu hombernan di Gad tabata biba.

³⁴I e yu hombernan di Ruben i e yu hombernan di Gad a yama e altar Testigu; "Pasobra," nan a bisa, "e ta un testigu entre nos, ku SENOR ta Dios."