Read Papantla Totonac Josue 23 Bible Online

Josue 23 - Papantla Totonac bible

Josue 23

¹Awor a sosode ku despues di hopi dia, ora SENOR a duna Israel sosiegu di tur nan enemigunan ront di nan, i Josue tabata bieu i di edat avansa,

²Josue a manda yama henter Israel, nan ansianonan, nan kabesantenan, nan huesnan i nan ofisialnan, i a bisa nan: "Mi ta bieu, di edat avansa.

³I boso a mira tur loke SENOR boso Dios a hasi ku tur e nashonnan aki pa boso motibu, pasobra SENOR boso Dios ta Esun ku tabata bringa pa boso.

⁴Mira, mi a parti pa boso e nashonnan aki ku a resta komo un erensia pa boso tribunan, huntu ku tur e nashonnan ku mi a destrui, for di Jordan te na Laman Grandi den direkshon di kaminda solo ta baha.

⁵I SENOR boso Dios, E lo saka nan for di boso dilanti, i kore ku nan for di boso dilanti; i boso lo podera di nan tera, meskos ku SENOR boso Dios a priminti boso.

⁶"Sea masha firme anto pa warda i hasi tur loke ta para skirbi den e buki di lei di Moises, pa boso no bira bai for di dje ni na man drechi ni na man robes,

⁷pa boso no asosia ku e nashonnan aki ku ainda ta meimei di boso, ni menshona nomber di nan diosnan, ni laga ningun hende hura den nan nomber, ni sirbi nan, ni buig pa nan.

⁸Ma boso mester pega na SENOR boso Dios, manera boso a hasi te dia djawe.

⁹"Pasobra SENOR a kore ku nashonnan grandi i poderoso for di boso dilanti; i pa loke ta boso, ningun hende no a keda para boso dilanti te dia djawe.

¹⁰Un di boso hombernan ta pone mil hui, pasobra SENOR boso Dios ta Esun ku ta bringa pa boso, meskos ku El a priminti boso.

¹¹Pesei, perkura bon pa boso stima SENOR boso Dios.

¹²"Pasobra si un dia boso bai bek i pega na e restu di e nashonnan aki, ku ainda ta meimei di boso, i emparenta ku nan, asina ku boso ta asosia ku nan i nan ku boso,

¹³sabi ku siguransa ku SENOR boso Dios lo no sigui kore ku e nashonnan aki for di boso dilanti; ma nan lo ta un laso i un trampa pa boso, i un zwip na boso kustia i sumpina den boso wowo, te ora boso perese for di riba e bon tera aki ku SENOR boso Dios a duna boso.

¹⁴"Awor mira, awe mi ta bai e kaminda di henter mundu, i boso sa di henter boso kurason i di henter boso alma ku ni un palabra di tur e bon palabranan ku SENOR boso Dios a papia tokante di boso no a faya; tur a keda kumpli pa boso, ni un di nan no a faya.

¹⁵I lo sosode ku meskos ku tur e bon palabranan ku SENOR boso Dios a papia ku boso a bin riba boso, asina SENOR lo trese riba boso tur e amenasanan, te ora ku El a destrui boso for di riba e bon tera aki ku SENOR boso Dios a duna boso.

¹⁶Ora boso transgresa e aliansa di SENOR boso Dios ku El a ordena boso, i bai sirbi otro diosnan i buig pa nan, e ora ei e rabia di SENOR lo kima kontra boso, i boso lo perese mesora for di riba e bon tera ku El a duna boso."