Read Papantla Totonac Josue 24 Bible Online

Josue 24 - Papantla Totonac bible

Josue 24

¹E ora ei Josue a reuni tur e tribunan di Israel na Sikem, i a manda yama e ansianonan di Israel, nan kabesantenan, nan huesnan i nan ofisialnan; i nan a presenta nan mes dilanti di Dios.

²I Josue a bisa henter e pueblo: "Asina SENOR, e Dios di Israel, ta bisa: 'For di tempunan antiguo boso tatanan tabata biba na e otro banda di Riu Eufrates, esta, Tare, tata di Abraham i tata di Nakor, i nan tabata sirbi otro diosnan.

³Anto Mi a saka boso tata Abraham for di e otro banda di Riu Eufrates, i a gui'e dor di henter tera di Kanaan, i a multiplika su desendientenan i a dun'e Isaak.

⁴I na Isaak Mi a duna Jakob ku Esau, i na Esau Mi a duna Seru Seir pa podera di dje; ma Jakob i su yu hombernan a baha bai Egipto.

⁵'E ora ei Mi a manda Moises ku Aaron, i Mi a afligi Egipto dor di loke Mi a hasi meimei di dje; i despues Mi a saka boso for di einan.

⁶I Mi a saka boso tatanan for di Egipto, i boso a yega na laman; i Egipto a persigui boso tatanan ku garoshi i koredo di kabai te na Laman Kora.

⁷Ma ora nan a sklama na SENOR, El a pone skuridat entre boso i e egipsionan, i a laga laman pasa riba nan, ku a tapa nan; i boso mes wowo a mira kiko Mi a hasi na Egipto. I boso a biba hopi tempu den desierto.

⁸'Despues Mi a trese boso den e tera di e amoreonan, kendenan tabata biba na e otro banda di Jordan, i nan a bringa kontra boso; i Mi a entrega nan den boso man, i boso a podera di nan tera ora Mi a destrui nan boso dilanti.

⁹E ora ei Balak, yu homber di Zipor, rei di Moab, a lanta i a bringa kontra Israel, i el a manda yama Balaam, yu homber di Beor, pa maldishona boso.

¹⁰Ma Mi no tabata kier a skucha Balaam. Pesei e mester a bendishona boso, i Mi a libra boso for di su man.

¹¹'I boso a krusa Jordan i a yega Jeriko; i e siudadanonan di Jeriko a bringa kontra boso, meskos ku e amoreo, e ferezeo, e kananeo, e heteo, e gergeseo, e heveo i e jebuseo tambe a hasi. Asina Mi a entrega nan den boso man.

¹²Despues Mi a manda e maribomba boso dilanti i esaki a kore ku e dos reinan di e amoreonan for di boso dilanti, ma no pa medio di boso spada ni boso bog.

¹³I Mi a duna boso un tera ku boso no a kultiva, i statnan ku boso no a traha, i boso a biba den nan; boso ta kome di kunukunan di wendruif i di hofinan di oleifi ku boso no a planta.'

¹⁴"Pesei anto, teme SENOR i sirbié ku sinseridat i den berdat; i pone un banda e diosnan ku boso tatanan tabata sirbi na e otro banda di Riu Eufrates i na Egipto, i sirbi SENOR.

¹⁵I si ta desagradabel den boso bista pa sirbi SENOR, skohe pa boso mes awe kende boso lo sirbi: sea e diosnan ku boso tatanan tabata sirbi, kualnan tabata na e otro banda di Riu Eufrates, of e diosnan di e amoreonan, den kende nan tera boso ta biba; ma pa loke ta ami i mi kas, nos lo sirbi SENOR."

¹⁶I e pueblo a kontesta i a bisa: "Leu sea di nos di bandona SENOR pa sirbi otro diosnan;

¹⁷pasobra ta SENOR nos Dios ta Esun ku a saka nos i nos tatanan for di tera di Egipto, for di e kas di sklabitut, i ku a hasi e senalnan grandi aki den nos bista, i a preserva nos durante henter e kaminda ku nos a pasa i den tur e pueblonan meimei di kualnan nos a pasa.

¹⁸I SENOR a kore ku tur e pueblonan for di nos dilanti, i ku e amoreonan ku tabata biba den e tera. Nos tambe lo sirbi SENOR, pasobra E ta nos Dios."

¹⁹E ora ei Josue a bisa e pueblo: "Boso lo no por sirbi SENOR, pasobra E ta un Dios santu. E ta un Dios yalurs; E lo no pordona boso transgreshon ni boso pikanan.

²⁰Si boso bandona SENOR i sirbi diosnan stranhero, e ora ei E lo bira i hasi boso dano i kaba ku boso despues ku El a hasi bon na boso."

²¹I e pueblo a bisa Josue: "No, ma nos lo sirbi SENOR."

²²I Josue a bisa e pueblo: "Boso ta testigu kontra boso mes ku boso a skohe pa boso mes e SENOR, pa sirbié." I nan a bisa: "Nos ta testigu."

²³"Pesei anto, kita e diosnan stranhero ku tin meimei di boso, i inklina boso kurason na SENOR, e Dios di Israel."

²⁴I e pueblo a bisa Josue: "Nos lo sirbi SENOR nos Dios i nos lo obedese Su bos."

²⁵Asina Josue a sera un aliansa ku e pueblo e dia ei, i a traha un statuto i un ordenansa pa nan na Sikem.

²⁶I Josue a skirbi e palabranan aki den e buki di lei di Dios; i el a kohe un piedra grandi i a pon'e para ayanan bou di e palu di eik ku tabata keda banda di e santuario di SENOR.

²⁷I Josue a bisa henter e pueblo: "Mira, e piedra aki lo ta un testigu kontra nos, pasobra el a tende tur e palabranan di SENOR ku El a papia ku nos; asina e lo ta un testigu kontra boso, pa boso no nenga boso Dios."

²⁸E ora ei Josue a laga e pueblo bai, kada un na su erensia.

²⁹I a sosode ku despues di e kosnan aki Josue, yu homber di Nun, e sirbido di SENOR, a muri na edat di shent'i dies ana.

³⁰I nan a der'e den e teritorio di su erensia na Timnat-sera ku ta keda den e serunan di Efrain, panort di Seru Gaas.

³¹I Israel a sirbi SENOR tur e dianan di Josue i tur e dianan di e ansianonan, kendenan a biba mas ku Josue, i kendenan tabata konose tur e echonan di SENOR ku El a hasi pa Israel.

³²Awor nan a dera e wesunan di Jose, ku e yunan di Israel a trese for di Egipto, na Sikem, den e pida tereno ku Jakob a kumpra serka e yu hombernan di Hamor, tata di Sikem, pa shen pida plaka; i esaki a bira erensia di Jose su yu hombernan.

³³I Eleazar, yu homber di Aaron, a muri; i nan a der'e na Gibea di su yu homber Finees, kual nan a dun'e den e serunan di Efrain.