Read Papantla Totonac Josue 3 Bible Online

Josue 3 - Papantla Totonac bible

Josue 3

¹E ora ei Josue a lanta mainta tempran; i e ku tur e yunan di Israel a sali bai for di Sitim i a yega Jordan, i nan a hospeda ayanan prome ku nan a krusa.

²I a sosode ku na fin di tres dia e ofisialnan a pasa dor di e kampamentu;

³i nan a ordena e pueblo, bisando: "Ora boso mira e arka di aliansa di SENOR boso Dios, i e saserdotenan levita ku ta kargu'e, boso mester sali for di boso luga i bai su tras.

⁴Sinembargo, mester tin entre e ku boso un distansia di mas o menos dos mil kodo. No yega te serka dje, pa boso por sa e kaminda ku boso mester bai, pasobra boso no a pasa pa e kaminda aki ainda."

⁵E ora ei Josue a bisa e pueblo: "Konsagra boso mes, pasobra manan SENOR lo hasi maraviyanan meimei di boso."

⁶I Josue a papia ku e saserdotenan, bisando: "Hisa e arka di aliansa i krusa dilanti di e pueblo." Asina nan a hisa e arka di aliansa i a bai dilanti di e pueblo.

⁷Awor SENOR a bisa Josue: "E dia aki lo Mi kuminsa halsabo den bista di henter Israel, pa nan sa ku lo Mi ta ku bo meskos ku Mi tabata ku Moises.

⁸Ademas, lo bo ordena e saserdotenan ku ta karga e arka di aliansa, bisando: 'Ora boso yega kantu di e awanan di Jordan, boso lo keda para den Jordan.'"

⁹E ora ei Josue a bisa e yunan di Israel: "Bin aki i tende e palabranan di SENOR boso Dios."

¹⁰I Josue a bisa: "Pa medio di esaki boso lo sa ku e Dios bibu ta meimei di boso, i ku sigur-sigur E lo kore ku e kananeo, e heteo, e heveo, e ferezeo, e gergeseo, e amoreo i e jebuseo for di boso dilanti.

¹¹Mira, e arka di aliansa di e SENOR di henter mundu ta krusa boso dilanti bai den Jordan.

¹²Pesei awor, tuma pa boso mes diesdos homber for di e tribunan di Israel, un homber pa kada tribu.

¹³I lo sosode ku ora plant'i pia di e saserdotenan ku tabata karga e arka di SENOR, e Senor di henter mundu, sosega den e awanan di Jordan, e awanan di Jordan lo wordu korta, i e awanan ku ta kore for di ariba lo keda para na un monton."

¹⁴Asina a sosode ku ora e pueblo a sali bai for di nan tentnan pa krusa Jordan huntu ku e saserdotenan ku tabata karga e arka di aliansa dilanti di e pueblo,

¹⁵i ora ku esnan ku tabata karga e arka a drenta Jordan, i e pianan di e saserdotenan ku tabata karga e arka a muha den e awa na kantu, (pasobra durante di henter e tempu di kosecha Jordan ta desborda pasa tur su oriyanan),

¹⁶e awanan ku tabata kore for di ariba a keda para i a lanta na un monton, un distansia grandi for di Adam, e stat ku ta keda banda di Saretan; i e awanan ku tabata basha bai den direkshon di laman di Araba, Laman Salu, a wordu korta kita kompletamente. Asina e pueblo a krusa enfrente di Jeriko.

¹⁷I e saserdotenan ku tabata karga e arka di aliansa di SENOR tabata para firme riba tera seku meimei di Jordan, mientras ku henter Israel tabata krusa riba tera seku, te ora henter e nashon a kaba di krusa Jordan.