Read Papantla Totonac Josue 4 Bible Online

Josue 4 - Papantla Totonac bible

Josue 4

¹Awor a sosode ku ora henter e nashon a kaba di krusa Jordan, SENOR a papia ku Josue, bisando:

²"Tuma pa boso mes diesdos homber for di e pueblo, un homber for di kada tribu,

³i ordena nan, bisando: 'Kohe pa boso mes diesdos piedra for di aki, for di meimei di Jordan, for di e luga kaminda e saserdotenan su pianan ta para firme, i pasa nan ofer ku boso, i pone nan na e luga kaminda boso lo hospeda awe nochi.'"

⁴Asina Josue a yama e diesdos hombernan ku el a nombra for di e yunan di Israel, un homber for di kada tribu,

⁵i Josue a bisa nan: "Krusa atrobe bai na e arka di SENOR boso Dios meimei di Jordan, i kada un di boso hisa un piedra pone riba su skouder, konforme e kantidat di e tribunan di e yunan di Israel.

⁶Laga esaki ta un senal meimei di boso, pa ora boso yunan puntra despues, bisando: 'Kiko e piedranan aki ta nifika pa boso?'

⁷boso bisa nan: 'Pasobra e awanan di Jordan a wordu korta dilanti di e arka di aliansa di SENOR; ora ku esaki tabata krusa Jordan e awanan di Jordan a wordu korta.' Asina e piedranan aki mester bira un konmemorashon pa e yunan di Israel pa semper."

⁸I asina e yunan di Israel a hasi manera Josue a ordena, i a kohe diesdos piedra for di meimei di Jordan, manera SENOR a bisa Josue, konforme e kantidat di e tribunan di e yunan di Israel; i nan a pasa nan ofer huntu ku nan, hiba nan na nan luga di hospeda, i aya nan a pone nan abou.

⁹E ora ei Josue a pone diesdos piedra riba otro meimei di Jordan na e luga kaminda e pianan di e saserdotenan ku tabata karga e arka di aliansa tabata para, i nan ta einan te dia djawe.

¹⁰Pasobra e saserdotenan ku tabata karga e arka a keda para meimei di Jordan te ora ku a kaba di kumpli ku tur loke SENOR a ordena Josue pa papia ku e pueblo, konforme tur loke Moises a ordena Josue. I den pura e pueblo a krusa bai;

¹¹i a sosode ku ora henter e pueblo a kaba di krusa, e arka di SENOR i e saserdotenan a krusa bai na e otro banda den bista di e pueblo.

¹²I e yu hombernan di Ruben i e yu hombernan di Gad i e mitar tribu di Manases a krusa pasa den ordu militar dilanti di e yunan di Israel, manera Moises a bisa nan;

¹³komo kuarenta mil, ekipa pa guera, a krusa pa bataya dilanti di SENOR bai na e sabananan di Jeriko.

¹⁴Riba e dia ei SENOR a halsa Josue den bista di henter Israel, asina ku nan tabatin temor p'e, meskos ku nan tabatin temor pa Moises tur e dianan di su bida.

¹⁵Awor SENOR a bisa Josue:

¹⁶"Ordena e saserdotenan ku ta karga e arka di testimonio pa nan subi sali for di Jordan."

¹⁷Asina Josue a ordena e saserdotenan, bisando: "Subi sali for di Jordan."

¹⁸I a sosode ku asina e saserdotenan ku tabata karga e arka di aliansa di SENOR a subi sali for di meimei di Jordan, i plant'i pia di e saserdotenan a toka tera seku, e awanan di Jordan a bolbe na nan luga, i a desborda pasa tur su oriyanan manera prome.

¹⁹Awor e pueblo a sali for di Jordan riba e di dies dia di e prome luna i a kampa na Gilgal, na e frontera pariba di Jeriko.

²⁰I e diesdos piedranan ei, ku nan a kohe for di den Jordan, Josue a pone riba otro na Gilgal.

²¹I el a bisa e yunan di Israel: "Den futuro, ora boso yunan puntra nan tata, bisando: 'Kiko e piedranan aki ta nifika?'

²²e ora ei boso lo splika boso yunan, bisando: 'Israel a krusa e Jordan aki riba tera seku.'

²³Pasobra SENOR boso Dios a seka e awanan di Jordan boso dilanti te ora boso a krusa, meskos ku SENOR boso Dios a hasi ku Laman Kora, ku El a hasi seka nos dilanti te ora nos a krusa,

²⁴pa tur e pueblonan di tera por sa ku man di SENOR ta poderoso, pa boso teme SENOR boso Dios pa semper."