Read Papantla Totonac Josue 5 Bible Online

Josue 5 - Papantla Totonac bible

Josue 5

¹Awor a sosode ku ora tur e reinan di e amoreonan ku tabata na e otro banda di Jordan bai pabou, i tur e reinan di e kananeonan ku tabata pega ku laman, a tende kon SENOR a seka e awanan di Jordan dilanti di e yunan di Israel te ora nan a krusa, nan kurason a dirti, i no tabatin kurashi mas den nan pa motibu di e yunan di Israel.

²E tempu ei SENOR a bisa Josue: "Traha pa bo mes kuchunan-di-piedra skerpi i bolbe sirkumsida e yunan di Israel pa di dos biaha."

³Asina Josue a traha pa su mes kuchunan-di-piedra skerpi i a sirkumsida e yunan di Israel na Gibeat-aaralot.

⁴I esaki ta e motibu pakiko Josue a sirkumsida nan: tur e hendenan ku a sali for di Egipto ku tabata homber, tur e hombernan di guera, a muri na kaminda den desierto, despues ku nan a sali for di Egipto.

⁵Pasobra tur e hendenan ku a sali tabata sirkumsida, ma tur e hendenan ku a nase na kaminda den desierto despues ku nan a sali for di Egipto, no a wordu sirkumsida.

⁶Pasobra e yunan di Israel a kana kuarenta ana den desierto te ora henter e nashon, esta, e hombernan di guera ku a sali for di Egipto, a perese, pasobra nan no a skucha na e bos di SENOR, na kendenan SENOR a hura ku E lo no a laga nan mira e tera ku SENOR a hura nan tatanan ku E lo a duna nos, un tera ku tin lechi i miel na abundansia.

⁷I Josue a sirkumsida nan yunan ku SENOR a lanta na nan luga, komo ku nan tabata insirkumsida, pasobra nan no a sirkumsida nan na kaminda.

⁸Awor a sosode ku ora nan a kaba di sirkumsida henter e nashon, nan a keda na nan luga den e kampamentu te ora nan a kura.

⁹E ora ei SENOR a bisa Josue: "Awe Mi a kita e reproche di Egipto for di boso." Pesei e luga ei ta wordu yama Gilgal te dia djawe.

¹⁰Mientras ku e yunan di Israel tabata kampa na Gilgal, nan a selebra Pasku riba e anochi di e di dieskuater dia di e luna den e sabananan di Jeriko.

¹¹I riba e dia despues di Pasku, presisamente riba e dia ei, nan a kome di loke e tera a produsi, pan sin zurdeg i mainshi tosta.

¹²I e mana a stop e dia despues ku nan a kome di loke e tera a produsi, asina ku e yunan di Israel no tabatin mana mas, ma nan a kome di loke tera di Kanaan a produsi durante di e ana ei.

¹³Awor a sosode ku ora Josue tabata pega ku Jeriko, el a hisa kara wak, i mira, tabatin un Homber para su dilanti ku Su spada saka for di balina den Su man teni, i Josue a bai serka djé i a bis'E: "Bo ta pa nos of pa nos atversarionan?"

¹⁴I El a bisa: "No, mas bien Mi a bin awor komo Kapitan di e ehersito di SENOR." I Josue a tira su kurpa abou ku su kara te na suela, i a adora, i a bis'E: "Kiko mi Senor tin di bisa Su sirbido?"

¹⁵I e Kapitan di SENOR Su ehersito a bisa Josue: "Kita bo sandalia for di bo pia, pasobra e luga ku bo ta para ariba ta santu." I asina Josue a hasi.