Read Papantla Totonac Josue 7 Bible Online

Josue 7 - Papantla Totonac bible

Josue 7

¹Ma e yunan di Israel tabata infiel enkuanto e kosnan ku tabata bou di maldishon, pasobra Akan, yu homber di Karmi, yu homber di Zabdi, yu homber di Zera, di e tribu di Juda, a kohe algun di e kosnan ku tabata bou di maldishon; pesei e rabia di SENOR a kima kontra e yunan di Israel.

²Awor Josue a manda hombernan for di Jeriko pa Ai ku ta keda pega ku Bet-aven, pariba di Bet-el, i a bisa nan: "Bai i spiona e tera." Asina e hombernan a bai i a spiona Ai.

³I nan a bolbe serka Josue i a bis'e: "No laga henter e pueblo bai; solamente dos of tres mil homber asina mester bai ataka Ai; no laga henter e pueblo molestia bai ayanan, pasobra nan ta poko."

⁴Pesei komo tres mil homber di e pueblo a bai ayanan, ma nan a hui pa e hombernan di Ai.

⁵I e hombernan di Ai a mata komo trint'i seis di nan hombernan, i a persigui nan for di e porta te na Sebarim, i a mata nan na e bahada, asina ku kurason di e pueblo a dirti i a bira manera awa.

⁶E ora ei Josue a sker su pananan i a tira su kurpa abou ku su kara te na suela dilanti di e arka di SENOR te ora nochi a sera, tantu e komo e ansianonan di Israel; i nan a pone stof riba nan kabes.

⁷I Josue a bisa: "Ai, SENOR Dios, pakiko Bo a trese e pueblo aki na e otro banda di Jordan, pa entrega nos den man di e amoreonan pa destrui nos? Miho nos a keda dispuesto pa biba na e otro banda di Jordan!

⁸O SENOR, kiko mi por bisa, awor ku Israel a bira lomba pa nan enemigunan?

⁹Pasobra e kananeonan i tur e habitantenan di e tera lo tende esaki, i nan lo rondona nos i korta nos nomber kita for di riba tera. I kiko Abo lo hasi pa Bo gran nomber?"

¹⁰Asina SENOR a bisa Josue: "Lanta! Pakiko bo a tira bo kurpa abou ku bo kara te na suela?

¹¹Israel a peka, i tambe nan a transgresa Mi aliansa ku Mi a ordena nan. I nan a kohe algun di e kosnan ku ta bou di maldishon i a horta i gana tambe. Ademas, nan a pone nan huntu ku nan mes kosnan.

¹²Pesei e yunan di Israel no por para dilanti di nan enemigunan; nan ta bira lomba i ta kore pa nan enemigunan, pasobra nan a bira maldishona. Lo Mi no ta ku boso mas si boso no destrui e kosnan ku ta bou di maldishon for di meimei di boso.

¹³"Lanta! Konsagra e pueblo i bisa: 'Konsagra boso mes pa manan, pasobra asina SENOR, e Dios di Israel, a bisa: "Tin kosnan ku ta bou di maldishon meimei di bo, O Israel. Bo no por para dilanti di bo enemigunan te ora boso a kita e kosnan ku ta bou di maldishon for di meimei di boso."

¹⁴'Anto mainta boso mester bin dilanti segun boso tribunan. I lo t'asina ku e tribu ku SENOR tuma pa medio di lot lo bin dilanti segun famianan, i e famia ku SENOR tuma lo bin dilanti segun kasnan; i e kas ku SENOR tuma lo bin dilanti, homber pa homber.

¹⁵I lo sosode ku esun ku wordu hana ku e kosnan ku ta bou di maldishon lo wordu kima ku kandela, e ku tur loke ta pertenese na dje, pasobra el a transgresa e aliansa di SENOR, i pasobra el a hasi un kos bergonsoso na Israel.'"

¹⁶Asina Josue a lanta mainta tempran i a trese Israel dilanti, segun tribu, i e tribu di Juda a wordu tuma.

¹⁷I el a trese e famia di Juda dilanti, i el a tuma e famia di e zeraitanan; i el a trese e famia di e zeraitanan dilanti, homber pa homber, i Zabdi a wordu tuma.

¹⁸I el a trese e hendenan di su kas dilanti, homber pa homber, i Akan, yu homber di Karmi, yu homber di Zabdi, yu homber di Zera, di e tribu di Juda, a wordu tuma.

¹⁹E ora ei Josue a bisa Akan: "Mi yu, mi ta rogabo, duna gloria na SENOR, e Dios di Israel, i dun'E alabansa; i kontami awor kiko bo a hasi. No skonde esaki pa mi."

²⁰Asina Akan a kontesta Josue i a bisa: "Di berdat, mi a peka kontra SENOR, e Dios di Israel, i esaki ta loke mi a hasi:

²¹ora mi a mira entre e botin un bunita mantel for di Sinar i dos shen siklo di plata i un bara di oro di un peso di sinkuenta siklo, mi a kudisha nan i a kohe nan; i mira, nan ta skondi bou di tera den mi tent, ku e plata bou di dje."

²²E ora ei Josue a manda mensaheronan, i nan a kore bai na e tent; i mira, e tabata skondi den su tent, ku e plata bou di dje.

²³I nan a saka nan for di den e tent i a trese nan pa Josue i pa tur e yunan di Israel, i nan a basha nan dilanti di SENOR.

²⁴E ora ei Josue, i henter Israel huntu kune, a kohe Akan, yu homber di Zera, e plata, e mantel, e bara di oro, su yu hombernan, su yu muhenan, su bueynan, su burikunan, su karnenan, su tent i tur loke tabata pertenese na dje, i nan a hiba nan na e vaye di Akor.

²⁵I Josue a bisa: "Pakiko bo a hinka nos den problema? SENOR lo hinka abo den problema riba e dia aki." I henter Israel a piedra nan ku piedra; i nan a kima nan ku kandela despues ku nan a piedra nan ku piedra.

²⁶I riba dje nan a lanta un monton grandi di piedra ku t'ei te dia djawe, i SENOR a bira for di e ferosidat di Su rabia. Pesei e luga ei ta wordu yama vaye di Akor te dia djawe.