Read Papantla Totonac Josue 8 Bible Online

Josue 8 - Papantla Totonac bible

Josue 8

¹Awor SENOR a bisa Josue: "No tene miedu ni desmaya. Hiba tur e hendenan di guera huntu ku bo i lanta bai Ai; mira, Mi a entrega den bo man e rei di Ai, su pueblo, su stat i su tera.

²I lo bo hasi ku Ai i su rei meskos ku bo a hasi ku Jeriko i su rei; solamente su botin i su bestianan boso mag kohe pa boso mes. Bai skonde parti patras di e stat pa atak'e."

³Asina Josue a lanta ku tur e hendenan di guera pa subi bai Ai; i Josue a skohe trinta mil homber, guereronan balente, i a manda nan bai den anochi.

⁴I el a ordena nan, bisando: "Mira, boso ta bai skonde parti patras di e stat pa atak'e. No bai muchu leu for di e stat, ma boso tur para kla.

⁵E ora ei ami, i henter e pueblo ku ta huntu ku mi, lo aserka e stat. I lo sosode ku ora nan sali pa kontra ku nos manera e prome biaha, nos lo hui nan dilanti.

⁶I nan lo persigui nos te ora nos aleha nan for di e stat, pasobra nan lo bisa: 'Nan ta hui nos dilanti manera e prome biaha.' Asina nos lo hui nan dilanti.

⁷I boso mester lanta i sali for di boso luga di skonde i podera di e stat, pasobra SENOR boso Dios lo entregu'e den boso man.

⁸Anto lo sosode ku ora boso a kohe e stat, boso mester pega e stat na kandela. Hasi esaki konforme e palabra di SENOR. Mira, ami a ordena boso."

⁹Asina Josue a manda nan bai, i nan a bai na e luga di skonde i a keda entre Bet-el i Ai, parti pabou di Ai; ma Josue a pasa e anochi ei meimei di e pueblo.

¹⁰Awor Josue a lanta mainta tempran i a reuni e pueblo, i el a bai Ai huntu ku e ansianonan di Israel, dilanti di e pueblo.

¹¹E ora ei tur e hendenan di guera ku tabata huntu kune a bai i a hala mas serka te yega dilanti di e stat, i a kampa na e banda nort di Ai. Awor tabatin un vaye entre e ku Ai.

¹²I el a tuma komo sinku mil homber i a pone nan skonde pa ataka entre Bet-el ku Ai, parti pabou di e stat.

¹³Asina nan a stashona e pueblo, henter e ehersito ku tabata na e banda nort di e stat, i su guardia di patras na e banda pabou di e stat, i Josue a pasa e anochi ei meimei di e vaye.

¹⁴I a sosode ku ora rei di Ai a mira esaki, e hombernan di e stat a pura i a lanta tempran i a sali pa kontra ku Israel den bataya, e ku henter su pueblo, na e luga apunta dilanti di e sabana. Ma e no tabata sa ku tabatin un emboskada poni p'e patras di e stat.

¹⁵I Josue i henter Israel a fingi di ta derota nan dilanti, i a hui bai pa e kaminda di desierto.

¹⁶I henter e pueblo ku tabata den e stat a wordu yama huntu pa persigui nan, i nan a persigui Josue i a wordu aleha for di e stat.

¹⁷Asina no a keda ni un homber na Ai ni na Bet-el ku no a sali bai tras di Israel, i nan a laga e stat habri i a persigui Israel.

¹⁸E ora ei SENOR a bisa Josue: "Ekstende e lansa ku bo tin den bo man den direkshon di Ai, pasobra lo Mi entregu'e den bo man." Asina Josue a ekstende e lansa ku e tabatin den su man den direkshon di e stat.

¹⁹I e hombernan ku a skonde a lanta mesora for di nan luga, i ora ku el a ekstende su man, nan a kore drenta den e stat i a kaptur'e; i mesora nan a pega e stat na kandela.

²⁰Ora ku e hombernan di Ai a drai wak, ata, e huma di e stat tabata bai laira, i nan no tabatin kaminda pa hui bai, ni p'aki ni p'aya, pasobra e pueblo ku tabata hui bai den desierto, a bira bin kontra esnan ku tabata persigui nan.

²¹Ora Josue i henter Israel a mira ku e hombernan ku tabata skondi a kaptura e stat i ku e huma di e stat tabata subi bai laira, nan a bira bai bek i a mata e hombernan di Ai.

²²I e otronan a sali for di e stat pa kontra ku nan, asina ku nan a keda atrapa meimei di Israel, algun p'aki banda i algun p'aya banda; i Israel a sigui mata nan te ora no a keda ni un di esnan ku a sobrebibi of ku a skapa.

²³Ma rei di Ai nan a kohe bibu i a hib'e serka Josue.

²⁴Awor a sosode ku ora Israel a kaba di mata tur e habitantenan di Ai den e sabana den desierto, kaminda nan a persigui nan, i tur a muri pa medio di filo di spada te ora nan a keda kompletamente destrui, henter Israel a bolbe bai Ai i a dal e ku filo di spada.

²⁵I tur esnan ku a muri e dia ei, tantu homber komo muhe, tabata diesdos mil, tur e hendenan di Ai.

²⁶Pasobra Josue no a hala su man, ku el a ekstende e lansa kune, atras, te ora ku el a destrui tur e habitantenan di Ai kompletamente.

²⁷Israel a tuma solamente e bestianan i e botin di e stat ei pa nan mes, konforme e palabra di SENOR ku El a ordena Josue.

²⁸Asina Josue a kima Ai i a hasie un monton di ruina pa semper, un desolashon te dia djawe.

²⁹I el a kologa rei di Ai na un palu te anochi; i ora solo tabata baha Josue a duna ordu pa kita su kurpa for di e palu i tir'e na entrada di e porta di stat, i nan a lanta un monton grandi di piedra riba dje, ku t'ei te dia djawe.

³⁰E ora ei Josue a traha un altar pa SENOR, e Dios di Israel, na Seru Ebal,

³¹meskos ku Moises, e sirbido di SENOR, a ordena e yunan di Israel, manera ta para skirbi den e buki di lei di Moises, un altar di piedra ku no ta gekap, riba kual ningun hende no a traha ku herment di heru; i nan a ofrese ofrendanan kima riba dje na SENOR, i a sakrifika ofrendanan di pas.

³²I ayanan el a skirbi riba e piedranan un kopia di e lei di Moises, lokual el a skirbi den presensia di e yunan di Israel.

³³I henter Israel, huntu ku nan ansianonan i ofisialnan i nan huesnan, tabata para na tur dos banda di e arka dilanti di e saserdotenan levita, kendenan tabata karga e arka di aliansa di SENOR, tantu stranhero komo yu di tera. Mitar di nan tabata para dilanti di Seru Gerizim i mitar di nan dilanti di Seru Ebal, meskos ku Moises, e sirbido di SENOR, a ordena na prinsipio, pa bendishona e pueblo di Israel.

³⁴I despues el a lesa tur e palabranan di e lei, e bendishon i e maldishon, konforme tur loke ta para skirbi den e buki di lei.

³⁵No tabatin ni un palabra di tur loke Moises a ordena ku Josue no a lesa dilanti di henter e asamblea di Israel, inkluyendo e muhenan, e mucha chikitunan i e stranheronan ku tabata biba meimei di nan.