Read Papantla Totonac Josue 9 Bible Online

Josue 9 - Papantla Totonac bible

Josue 9

¹Awor a sosode ku ora tur e reinan ku tabata na e otro banda di Jordan, den e serunan i den e sabananan i na henter e kosta di Laman Grandi den direkshon di Libano, e heteo i e amoreo, e kananeo, e ferezeo, e heveo i e jebuseo, a tende esaki,

²nan a bin huntu den un akuerdo pa bringa kontra Josue i kontra Israel.

³Ora ku e habitantenan di Gabaon a tende kiko Josue a hasi ku Jeriko i ku Ai,

⁴nan tambe a uza astusia i a sali bai komo embahador, i a pone saku tur gasta riba nan buriku, i saku di bina tur gasta, gesker i gelapi,

⁵i sandalia, tur gasta i tur gelapi, na nan pia, i pana tur gasta na nan kurpa; i henter nan provishon di pan tabata seku i tur garna.

⁶I nan a bai serka Josue na e kampamentu di Gilgal, i a bisa e ku e hombernan di Israel: "Nos a bin for di un tera leu; pesei awor, sera un aliansa ku nos."

⁷I e hombernan di Israel a bisa e heveonan: "Kisas ta na nos mes tera boso ta biba; e ora ei kon nos por sera un aliansa ku boso?"

⁸Ma nan a bisa Josue: "Nos ta bo sirbido." I Josue a bisa nan: "Ken boso ta, i di unda boso ta bin?"

⁹I nan a bis'e: "Bo sirbidonan a bin di un tera masha leu mes, pa motibu di e nomber di SENOR bo Dios; pasobra nos a tende di Su fama i di tur loke ku El a hasi na Egipto,

¹⁰i di tur loke ku El a hasi ku e dos reinan di e amoreonan, kendenan tabata na e otro banda di Jordan--ku Sehon, rei di Hesbon, i ku Og, rei di Basan, kende tabata na Astarot.

¹¹Pesei nos ansianonan i tur e habitantenan di nos tera a papia ku nos, bisando: 'Tuma den boso man provishon pa e biahe, i bai topa nan i bisa nan: "Nos ta boso sirbido; pesei awor, sera un aliansa ku nos."'

¹²E pan di nos aki tabata kayente ora nos a koh'e pa nos provishon for di nos kasnan riba e dia ku nos a sali pa bin serka boso; ma awor, mira, e ta seku i tur garna.

¹³I e sakunan di bina aki, ku nos a yena, tabata nobo, i mira, nan ta tur gesker; i e pananan aki di nos i nos sandalianan ta tur gasta pa motibu di e biahe ku tabata asina largu."

¹⁴Asina e hombernan di Israel a inspekta algun di nan provishonnan, ma no a konsulta ku SENOR.

¹⁵I Josue a hasi pas ku nan i a sera un aliansa ku nan, pa laga nan na bida; i e lidernan di e kongregashon a hasi un huramentu na nan.

¹⁶I a sosode ku na final di tres dia, despues ku nan a sera un aliansa ku nan, nan a tende ku nan tabata bisina, i ku ta na nan mes tera nan tabata biba.

¹⁷Anto e yunan di Israel a sali bai i a yega nan statnan riba e di tres dia. Awor nan statnan tabata Gabaon, Kafira, Beerot i Kiriat-jearim.

¹⁸I e yunan di Israel no a mata nan, pasobra e lidernan di e kongregashon a hura nan pa SENOR, e Dios di Israel. I henter e kongregashon a murmura kontra e lidernan.

¹⁹Ma tur e lidernan a bisa henter e kongregashon: "Nos a hura nan pa SENOR, e Dios di Israel, i awor nos no por mishi ku nan.

²⁰Esaki nos lo hasi ku nan: Nos lo laga nan na bida, pa furia no kai riba nos pa motibu di e huramentu ku nos a hasi na nan."

²¹I e lidernan a bisa nan: "Laga nan na bida." Asina nan a bira kapdo di palu i kargado di awa pa henter e kongregashon, manera e lidernan a bisa nan.

²²E ora ei Josue a manda yama nan i a papia ku nan, bisando: "Pakiko boso a gana nos, bisando: 'Nos ta biba hopi leu for di boso,' siendo ku ta na nos tera boso ta biba?

²³Pesei awor, boso ta maldishona, i pa semper boso lo ta esklabu; boso lo ta kapdo di palu i kargado di awa pa e kas di mi Dios."

²⁴I nan a kontesta Josue i a bisa: "Komo ku siguramente nan a konta bo sirbidonan ku SENOR bo Dios a ordena Su sirbido Moises pa duna boso henter e tera, i pa destrui tur e habitantenan di e tera boso dilanti, pesei nos tabatin gran temor pa nos bida pa motibu di boso, i a hasi esaki.

²⁵I awor mira, nos ta den bo man; hasi ku nos manera ta parse bon i korekto den bo bista."

²⁶Asina el a hasi ku nan, i a libra nan for di man di e yunan di Israel, i nan no a mata nan.

²⁷I e dia ei Josue a hasi nan kapdo di palu i kargado di awa pa e kongregashon i pa e altar di SENOR, te dia djawe, na e luga ku E lo a skohe.