Read Papantla Totonac 2 Tesalonisensenan 1 Bible Online

2 Tesalonisensenan 1 - Papantla Totonac bible

2 Tesalonisensenan 1

¹Pablo i Silvano i Timoteo, Na e iglesia di e tesalonisensenan den Dios nos Tata i Senor Jesu-Cristo:

²Grasia sea ku boso i pas di Dios Tata i di Senor Jesu-Cristo.

³Nos mester gradisi Dios semper pa boso, rumannan, manera ta pas pa nos hasi, pasobra boso fe a krese hopi, i e amor di kada un di boso pa otro ta bira mas i mas grandi;

⁴pesei nos mes ta gaba boso den e iglesianan di Dios pa boso perseveransia i fe den tur boso persekushonnan i aflikshonnan ku boso ta soporta.

⁵Esaki ta un indikashon bon kla di e huisio hustu di Dios, pa boso wordu konsidera digno di e reino di Dios, pa kual di berdat boso ta sufri.

⁶Pasobra ta hustu dilanti di Dios pa paga ku aflikshon esnan ku ta afligi boso,

⁷i pa duna alivio na boso ku ta wordu afligi i na nos tambe ora Senor Jesus wordu manifesta for di shelu ku Su angelnan poderoso den kandela tur na flam,

⁸pa duna pago merest na esnan ku no konose Dios i na esnan ku no ta obedese e evangelio di nos Senor Jesus.

⁹I esakinan lo paga e kastigu di perdishon eterno, leu for di e presensia di Senor i di e gloria di Su poder,

¹⁰ora ku E bin pa wordu glorifika den Su santunan riba e dia ei, i pa wordu atmira dor di tur esnan ku a kere--pasobra boso a kere nos testimonio duna na boso.

¹¹Ku e proposito aki tambe nos ta hasi orashon semper pa boso, ku nos Dios lo konsidera boso digno di e yamada aki i, ku Su poder, kumpli ku tur deseo pa hasi bon i ku tur obra di fe;

¹²pa e nomber di nos Senor Jesus wordu glorifika den boso, i boso den djé, segun e grasia di nos Dios i di Senor Jesu-Cristo.