Read Papantla Totonac 2 Tesalonisensenan 2 Bible Online

2 Tesalonisensenan 2 - Papantla Totonac bible

2 Tesalonisensenan 2

¹Awor nos ta pidi boso, rumannan, ku bista riba e binida di nos Senor Jesu-Cristo, i di nos reunion kuné,

²pa boso no wordu movi lihe for di boso manera di pensa, ni bira intrankil pa motibu di un spiritu of un mensahe of un karta ku supuestamente a bin di nos, ku ta bisa ku e dia di Senor a yega kaba.

³No laga ni un hende gana boso di ningun manera, pasobra e dia ei lo no bin prome ku e kaimentu for di fe yega i e homber di pika keda manifesta, e yu di perdishon,

⁴kende ta opone i ta halsa su mes riba tur loke ta wordu yama Dios of opheto di adorashon, asina ku e ta tuma asiento den e tempel di Dios, proklamando su mes komo Dios.

⁵Boso no ta korda ku mientras mi tabata serka boso ainda, mi tabata konta boso e kosnan aki?

⁶I boso sa kiko ta strob'e awor, pa na su tempu e wordu manifesta.

⁷Pasobra e misterio di inikidat ta obrando kaba; solamente esun ku ta stroba awor lo sigui hasi asina te ora ku e wordu kita for di kaminda.

⁸I e ora ei e malbado ei lo wordu manifesta, kende Senor lo destrui ku e rosea di Su boka i kaba kune ku e resplandor di Su binida,

⁹esta, esun kende su binida ta di akuerdo ku e aktividat di Satanas, ku tur poder i senalnan i maraviyanan falsu,

¹⁰i ku tur e engano di inikidat pa esnan ku ta perese, pasobra nan no a asepta e amor pa e berdat, pa nan por wordu salba.

¹¹I pa e motibu aki Dios lo manda riba nan un influensia di eror, pa nan kere mentira,

¹²pa nan tur wordu huzga, kendenan no a kere e berdat, ma a hiba gustu den maldat.

¹³Ma nos mester gradisi Dios semper pa boso, rumannan stima di Senor, pasobra Dios a skohe boso for di prinsipio pa salbashon pa medio di e obra di santifikashon dor di e Spiritu i fe den e berdat.

¹⁴I ta pa esaki El a yama boso pa medio di nos evangelio, pa boso hana e gloria di nos Senor Jesu-Cristo.

¹⁵Asina anto, rumannan, para firme i tene na e tradishonnan ku nos a sina boso, sea pa medio di palabra of pa medio di nos karta.

¹⁶Awor ku nos Senor Jesu-Cristo mes i Dios nos Tata, Kende a stima nos i a duna nos konsuelo eterno i bon speransa pa medio di grasia,

¹⁷konsola i fortalese boso kurason den tur bon obra i palabra.