Read Papantla Totonac 2 Tesalonisensenan 3 Bible Online

2 Tesalonisensenan 3 - Papantla Totonac bible

2 Tesalonisensenan 3

¹Finalmente, rumannan, hasi orashon pa nos, ku e palabra di Senor por plama rapidamente i wordu glorifika, meskos ku serka boso tambe;

²i ku nos por wordu libra di hendenan perverso i malbado; pasobra no ta tur tin fe.

³Ma Senor ta fiel, i E lo fortalese i warda boso di e malbado.

⁴I nos tin konfiansa den Senor tokante di boso, ku boso ta hasiendo i lo sigui hasi loke nos ta ordena.

⁵I ku Senor dirigi boso kurason den e amor di Dios i den e firmesa di Cristo.

⁶Awor nos ta ordena boso, rumannan, den e nomber di nos Senor Jesu-Cristo, pa boso aleha boso di tur ruman ku ta hiba un bida desordena i no segun e tradishon ku boso a risibl for di nos.

⁷Pasobra boso mes sa di ki manera boso mester sigui nos ehempel, pasobra nos no a komporta nos mes na un manera desordena meimei di boso;

⁸tampoko nos no a kome pan di ningun hende sin paga, ma ku trabou i esfuerso nos a traha anochi i di dia, pa nos no ta un karga pa ningun di boso;

⁹no pasobra nos no tin derecho di hasi esaki, ma pa nos pone nos mes komo un modelo pa boso, pa boso sigui nos ehempel.

¹⁰Pasobra tambe tempu ku nos tabata serka boso, nos tabatin e kustumber di ordena boso esaki: si un hende no kier traha, no lagu'e kome tampoko.

¹¹Pasobra nos ta tende ku algun den boso ta hiba un bida desordena, sin hasi ningun trabou, ma ta mete den asunto di otro hende.

¹²Awor sorto di hendenan asina nos ta ordena i eksorta den Senor Jesu-Cristo pa traha na un manera trankil i kome nan mes pan.

¹³Ma boso, rumannan, no kansa di hasi bon.

¹⁴Ma si algun hende no obedese nos instrukshon den e karta aki, tuma bon nota di e hende ei i no asosia kune, pa e wordu brongosa.

¹⁵Tog, no konsider'e komo enemigu, ma spiert'e komo ruman.

¹⁶Awor, ku e Senor di pas mes kontinuamente duna boso pas den tur sirkumstansia. Senor sea ku boso tur!

¹⁷Ami, Pablo, ta skirbi e saludo aki ku mi mes man, i esaki ta e senal den tur karta; asina mi ta skirbi.

¹⁸Grasia di nos Senor Jesu-Cristo sea ku boso tur. Amen.