Read Papantla Totonac 1 Timoteo 1 Bible Online

1 Timoteo 1 - Papantla Totonac bible

1 Timoteo 1

¹Pablo, un apostel di Cristo Jesus segun e mandamentu di Dios nos Salbador, i di Cristo Jesus, nos speransa;

²Na Timoteo, mi yu berdadero den fe: Grasia, miserikordia i pas di Dios Tata i Cristo Jesus nos Senor.

³Manera mi a konsehabo ora mi tabata bai Masedonia, keda na Efeso, pa bo instrui sierto hombernan pa nan no sina hende doktrina strano,

⁴ni paga atenshon na fabulanan i genealogianan sin fin, kualnan mas bien ta lanta spekulashon na luga di e obra di Dios ku ta pa medio di fe.

⁵Ma e proposito di nos instrukshon ta amor for di un kurason puru i un bon konsenshi i un fe sinsero.

⁶Pasobra algun hende, dor di desvia for di e kosnan aki, a bira bai den diskushon bano,

⁷kendenan kier ta sinadonan di Lei, maske nan no ta komprende di kiko nan ta papia, ni e asuntonan ku nan ta konfirma.

⁸Ma nos sa ku e Lei ta bon, si un hende uz'e legalmente,

⁹siendo konsiente di e echo ku lei no ta traha pa hende hustu, ma pa esnan ku ta sin lei i ku ta rebelde, pa e impionan i pekadonan, pa esnan impuru i profano, pa esnan ku ta mata nan tata i mama, pa matadonan

¹⁰i fornikadonan, homoseksualnan, sekuestradonan, ganadonan, huradonan falsu, i kualkier otro kos ku ta kontrario na sinansa sano,

¹¹segun e evangelio glorioso di e Dios bendishona, kual a wordu konfia na mi.

¹²Mi ta gradisi Cristo Jesus nos Senor, Kende a fortalesemi, pasobra El a konsiderami fiel dor di ponemi den e ministerio,

¹³maske ku antes mi tabata un blasfemado i un persiguido i masha agresivo mes. I tog mi a hana miserikordia, pasobra mi a aktua ignorantemente den inkredulidat;

¹⁴i e grasia di nos Senor tabata mas ku abundante, ku e fe i amor, kualnan ta den Cristo Jesus.

¹⁵Esaki ta un palabra fiel, ku ta merese pa wordu asepta kompletamente, ku Cristo Jesus a bin na mundu pa salba pekado, entre kendenan ami ta esun di prome.

¹⁶I ta hustamente pa e motibu aki mi a hana miserikordia, pa asina den mi, komo esun di prome, Jesu-Cristo por a demostra Su pasenshi perfekto, komo un ehempel pa esnan ku lo a kere den djé pa bida eterno.

¹⁷Awor na e Rei eterno, inmortal, invisibel, e uniko Dios, sea onor i gloria pa semper i semper. Amen.

¹⁸E mandamentu aki mi ta konfiabo kune, Timoteo, mi yu, konforme e profesianan ku a wordu tresi antes tokante di bo, ku pa medio di nan bo por lucha e bon lucha,

¹⁹teniendo fe i un bon konsenshi, kualnan algun hende a rechasa i asina a noufraga enkuanto nan fe.

²⁰Entre esakinan: Himeneo i Alehandro, kendenan mi a entrega na Satanas, pa sina nan di no blasfema.