Read Papantla Totonac 1 Timoteo 2 Bible Online

1 Timoteo 2 - Papantla Totonac bible

1 Timoteo 2

¹Pesei, prome ku tur kos, mi ta eksorta pa suplika, orashon, petishon i gradisimentu wordu hasi pa tur hende,

²pa reinan i tur esnan ku ta den outoridat, pa nos hiba un bida trankil i ketu den tur santidat i dignidat.

³Esaki ta bon i aseptabel den bista di Dios nos Salbador,

⁴Kende ta desea pa tur hende wordu salba i yega na konosementu di e berdat.

⁵Pasobra ta un Dios so tin, i un Mediador tambe entre Dios i hende, e hende Cristo Jesus,

⁶Kende a duna Su mes komo e preis di reskate pa tur hende--e testimonio duna na su debido tempu.

⁷I pa esaki mi a wordu nombra komo predikado i apostel, (mi ta papia berdat, mi no ta gana) komo sinado di e paganonan den fe i berdat.

⁸Pesei mi kier pa e hombernan di tur luga hasi orashon, hisando mannan santu, sin rabia i sin pleitu.

⁹Meskos, mi kier pa hende muhe dorna nan mes ku bisti apropia, desente i modera, no ku kabei tur na flegt i oro of perla of bisti kostoso,

¹⁰sino mas bien ku bon obra, manera ta pas pa muhenan ku ta teme Dios.

¹¹Laga hende muhe risibi instrukshon den silensio ku tur sumishon.

¹²Ma mi no ta permiti hende muhe sina hende homber ni eherse outoridat riba hende homber, ma pa keda ketu.

¹³Pasobra ta Adam a wordu forma prome, despues Eva.

¹⁴I no ta Adam a wordu gana, ma e muhe, siendo gana, a kai den transgreshon.

¹⁵Ma muhenan lo wordu salba dor di e hanamentu di yu, si nan kontinua den fe i amor i santidat ku modestia.