Read Papantla Totonac 1 Timoteo 4 Bible Online

1 Timoteo 4 - Papantla Totonac bible

1 Timoteo 4

¹Ma e Spiritu ta bisa klaramente ku den e ultimo tempunan algun lo kai for di fe, dor di paga atenshon na spiritunan enganoso i doktrinanan di demononan,

²pa medio di e hipokresia di ganadonan, kende nan mes konsenshi a wordu kima komo si fuera ta ku heru kayente esaki a wordu hasi,

³kendenan ta prohibi matrimonio i ta ordena pa apstene di kuminda, lokual Dios a krea pa wordu komparti ku gradisimentu dor di esnan ku ta kere i ta konose e berdat.

⁴Pasobra tur loke Dios a krea ta bon, i nada no ta di rechasa, si e wordu risibi ku gradisimentu,

⁵pasobra e ta wordu santifika pa medio di e palabra di Dios i orashon.

⁶Si bo mustra e rumannan riba e kosnan aki, lo bo ta un bon sirbido di Cristo Jesus, alimenta ku e palabranan di e fe i di e doktrina sano ku bo a sigui.

⁷Ma rechasa fabulanan profano i di muhe bieu. Mas bien, disiplina bo mes den santidat;

⁸pasobra disiplina korporal ta di poko probecho, ma santidat ta probechoso pa tur kos, komo ku e ta kontene promesa pa e bida presente i pa esun ku ta bin.

⁹Esaki ta un palabra fiel ku merese tur aseptashon.

¹⁰Pasobra ta pa esaki nos ta traha i lucha, pasobra nos a fiha nos speransa den e Dios bibu, Kende ta e Salbador di tur hende, spesialmente di kreyentenan.

¹¹Ordena i sina e kosnan aki.

¹²No laga ningun hende menospresia bo hubentut, ma mas bien den palabra, kondukta, amor, fe i puresa, demostra bo mes di ta un ehempel pa esnan ku ta kere.

¹³Te ora mi bin, okupa bo mes ku lesamentu di Skritura, eksortashon i sinamentu.

¹⁴No neglisha e don spiritual ku tin den bo, ku a wordu duna na bo pa medio di e palabra di profesia ora ku e ansianonan a pone man riba bo.

¹⁵Perkura pa e kosnan aki; sea dedika na nan, pa bo progreso por ta bisto pa tur hende.

¹⁶Paga bon tino na bo mes i na bo sinansa; persevera den e kosnan aki; pasobra hasiendo esaki lo bo sigura salbashon, tantu pa bo mes komo pa esnan ku ta tendebo.