Read Papantla Totonac 1 Timoteo 5 Bible Online

1 Timoteo 5 - Papantla Totonac bible

1 Timoteo 5

¹No reprende un homber bieu na manera brutu, ma mas bien spiert'e manera ta spierta un tata. Trata e hombernan mas hoben manera ruman,

²e muhenan mas bieu manera mama, e muhenan mas hoben manera ruman muhe, den tur puresa.

³Onra e biudanan ku ta biuda di berdat;

⁴ma si un biuda tin yu of nietu, laga nan sina prome di praktika piedat pa ku nan mes famia, i di rekompensa nan mayornan, pasobra esaki ta aseptabel den bista di Dios.

⁵Awor esun ku di berdat ta biuda, i ku a keda su so, a pone su speransa den Dios, i ta sigui den suplika i orashon di dia i anochi.

⁶Ma esun ku entrega su mes na plaser ta morto mientras ku e ta na bida.

⁷Ordena e kosnan aki tambe, pa nan por biba sin reproche.

⁸Ma si un hende no provee pa su mes hendenan, i spesialmente pa esnan di su kas, el a nenga e fe i ta pio ku un inkredulo.

⁹Laga un biuda wordu poni riba lista solamente si e tin mas ku sesenta ana, i tabata esposa di un homber so,

¹⁰i si e tin testimonio di bon obra; i si el a kria yu, si el a mustra hospitalidat na stranhero, si el a laba pia di e santunan, si el a yuda esnan den aflikshon i si el a dedika su mes na tur sorto di bon obra.

¹¹Ma nenga di pone biudanan mas hoben riba lista, pasobra ora nan sinti deseonan sensual ku ta aleha nan di Cristo, nan kier kasa,

¹²asina tresiendo kondenashon, pasobra nan a pone nan prome promesa un banda.

¹³I na mes tempu nan ta bai ront di kas pa kas i ta sina kana pornada, i no solamente kana pornada, ma tambe nan ta sina hasi redu i mete den asunto di otro hende, papiando kosnan ku no ta kumbini.

¹⁴Pesei, mi kier pa e biudanan mas hoben kasa, hana yu, perkura pa nan kas, i no duna e enemigu okashon pa papia malu di nan;

¹⁵pasobra ya kaba algun a bira bai, pa sigui tras di Satanas.

¹⁶Si un muhe ku ta un kreyente tin biudanan na su enkargo, lagu'e yuda nan, i no laga e karga keda riba iglesia, pa iglesia por yuda esnan ku di berdat ta biuda.

¹⁷Laga e ansianonan ku ta goberna bon wordu konsidera digno di dobel onor, spesialmente esnan ku ta traha duru den predikamentu i sinamentu.

¹⁸Pasobra Skritura ta bisa: "No bisti buey bosal ora ku e ta trapa mainshi," i "E trahado ta digno di su sueldo."

¹⁹No asepta un akusashon kontra un ansiano, si no ta a base di dos of tres testigu.

²⁰Esnan ku ta sigui den pika, reprende nan den presensia di tur hende, asina ku e otronan tambe lo hana miedu di hasi pika.

²¹Mi ta ordenabo den e presensia di Dios i di Cristo Jesus i di Su angelnan skohi, pa mantene e prinsipionan aki sin prehuisio, sin hasi nada ku parsialidat.

²²No pone man muchu lihe riba ningun hende i asina komparti responsabilidat den e pikanan di otro hende; mantene bo mes puru.

²³No bebe awa so mas, ma tuma un poko bina pa motibu di bo stoma i bo enfermedatnan frekuente.

²⁴E pikanan di algun hende ta asina evidente, i nan ta bai nan dilanti na huisio; pa otronan nan pikanan ta sigui despues.

²⁵Di e mesun manera tambe, obranan ku ta bon ta asina evidente, i esnan ku no t'asina no por keda skondi.