Read Papantla Totonac 1 Timoteo 6 Bible Online

1 Timoteo 6 - Papantla Totonac bible

1 Timoteo 6

¹Laga tur ku ta bou di yugo komo esklabu konsidera nan mes shonnan digno di tur onor, pa e nomber di Dios i e doktrina no wordu blasfema.

²I laga esnan ku tin kreyentenan komo nan shon no falta respet ku nan, pasobra nan ta ruman, ma laga nan sirbi nan mas miho ainda, pasobra esnan ku ta disfruta di e benefisio di nan sirbishi ta kreyentenan i stimanan. Sina i predika e prinsipionan aki.

³Si un hende ta sina un doktrina diferente i no ta bai di akuerdo ku palabranan sano, esnan di nos Senor Jesu-Cristo, i ku e doktrina ku ta segun santidat,

⁴e ta orguyoso i no ta komprende nada; ma e tin un opseshon enkuanto preguntanan kontroversial i pleitamentu tokante di palabra, for di kualnan ta lanta envidia, pleitu, palabra di abuso, sospecho malu,

⁵i pleitamentu konstante entre hendenan ku mente korupto i priva di e berdat, kendenan ta supone ku santidat ta un medio pa hasi ganashi.

⁶Ma di berdat, santidat akompana pa kontentamiento ta di gran ganashi.

⁷Pasobra nos no a trese nada den mundu, i nos no por hiba nada for di dje tampoko.

⁸I si nos tin kuminda i pana pa bisti, ku esakinan nos mester ta kontentu.

⁹Ma esnan ku kier bira riku ta kai den tentashon i den trampa i den hopi deseonan loko i danino, kualnan ta hundi hende den ruina i destrukshon.

¹⁰Pasobra amor pa plaka ta rais di tur sorto di maldat, i algun hende, dor di desea esaki, a desvia for di e fe, i a traspasa nan mes ku hopi dolo.

¹¹Ma hui pa e kosnan aki, abo, homber di Dios, i buska hustisia, santidat, fe, amor, perseveransia i mansedumbre.

¹²Lucha e bon lucha di fe; gara e bida eterno pa kual bo a wordu yama, i bo a duna e bon testimonio den presensia di hopi testigu.

¹³Mi ta ordenabo den e presensia di Dios, Kende ta duna bida na tur kos, i di Cristo Jesus, Kende a duna e bon testimonio dilanti di Ponsio Pilato,

¹⁴pa bo warda e mandamentu sin mancha ni reproche, te na e aparishon di nos Senor Jesu-Cristo,

¹⁵kual E lo manifesto na su debido tempu--Esun, Kende ta e bendishona i e uniko Soberano, e Rei di reinan, i Senor di senornan;

¹⁶Kende so tin inmortalidat i ta biba den e lus inaksesibel; Kende ningun hende no a mira ni por mira. Na E sea onor i dominio eterno! Amen.

¹⁷Instrui esnan ku ta riku den e mundu aktual pa nan no ta soberbe i pa nan no fiha nan speransa riba e insiguridat di rikesa, ma riba Dios, Kende ta provee pa nos tur kos na abundansia pa nos disfruta di nan.

¹⁸Instrui nan pa hasi bon, pa nan ta riku den bon obra, pa nan ta generoso i dispuesto pa komparti,

¹⁹pa nan montona pa nan mes e tesoro di un bon fundeshi pa futuro, pa nan gara loke ta bida berdadero.

²⁰O Timoteo, warda loke a wordu konfia na bo, evitando papiamentu profano i bano, i e argumentonan kontradiktorio ku ta bin di loke falsamente ta wordu yama "konosementu"--

²¹lokual algun hende a profesa i asina a desvia for di e fe. Grasia sea ku bo. Amen.