Read Papantla Totonac 2 Timoteo 4 Bible Online

2 Timoteo 4 - Papantla Totonac bible

2 Timoteo 4

¹Mi ta hurabo den e presensia di Dios i di Cristo Jesus, Kende lo huzga e bibunan i e mortonan: (mi ta hurabo) dilanti di Su aparishon i Su reino:

²predika e palabra; sea prepara na tempu i for di tempu; spierta, reprende, eksorta, ku hopi pasenshi i instrukshon.

³Pasobra e tempu lo bin ku nan lo no soporta doktrina sano mas; ma alkontrario, pa satisfase nan mes deseonan, nan lo akumula pa nan mes sinadonan pa bisa nan loke nan orea ku ta kishiki kier tende,

⁴i lo bira nan orea for di e berdat, i lo bolbe na fabula.

⁵Ma abo, sea sobrio den tur kos, soporta aflikshon, hasi e trabou di un evangelista, kumpli ku bo ministerio.

⁶Pasobra ami ta wordu basha kaba komo un ofrenda di bibida, i mi tempu di bai a yega.

⁷Mi a lucha e bon lucha, mi a termina e kareda, mi a warda e fe;

⁸den futuro ta warda pa mi e korona di hustisia, kual Senor, e Hues hustu, lo dunami riba e dia ei; i no na ami so, ma tambe na tur esnan ku a stima Su binida.

⁹Hasi tur esfuerso pa bin serka mi pronto,

¹⁰pasobra Demas, kende a stima e mundu aktual aki, a bandonami i a bai Tesalonika; Kresente a bai Galasia, Tito a bai Dalmasia.

¹¹Lukas so ta serka mi. Buska Marko i tres'e huntu ku bo, pasobra e ta util pa mi pa e sirbishi.

¹²Ma Tikiko mi a manda na Efeso.

¹³Ora bo bin, trese e mantel ku mi a laga na Troas serka Karpo, i e bukinan, spesialmente e perkamentnan.

¹⁴Alehandro, e plate, a tratami hopi malu; Senor lo pagu'e segun su echonan.

¹⁵Abo tambe, wardabo di dje, pasobra vigorosamente el a opone su mes kontra nos sinansa.

¹⁶Na mi prome defensa ni un hende no a apoyami, ma tur a bandonami; ku esaki no wordu konta kontra nan.

¹⁷Ma Senor a para na mi lado i a fortalesemi, pa dor di mi e predikamentu wordu kumpli totalmente i tur e paganonan tend'e; i mi a wordu libra for di boka di leon.

¹⁸Senor lo librami di tur echo malu, i lo preservami pa Su reino selestial; na E sea gloria pa semper i semper. Amen.

¹⁹Kuminda Priska i Akila i e hendenan di kas di Onesiforo.

²⁰Erasto a keda na Korinto, ma Trofimo mi a laga malu na Mileto.

²¹Hasi tur esfuerso pa bo bin prome ku wenter. Eubulo ta saludabo, tambe Pudente i Lino i Claudia i tur e rumannan.

²²Senor sea ku bo spiritu. Grasia sea ku boso. Amen.