Read Papantla Totonac Hebreonan 10 Bible Online

Hebreonan 10 - Papantla Totonac bible

Hebreonan 10

¹Pasobra e Lei, komo ku e tin solamente un sombra di e bon kosnan ku ta bin i no e forma berdadero mes di kosnan, nunka por hasi esnan ku ta hala serka bira perfekto pa medio di e mesun sakrifisionan ku nan ta ofrese kontinuamente, ana aden ana afo.

²Di otro manera nan lo no a stop di wordu ofresi? Pasobra e adoradonan, unabes ku nan a wordu purifika, lo no tabata konsiente di pika mas.

³Ma den e sakrifisionan ei tin un rekordatorio di pika ana aden ana afo.

⁴Pasobra ta imposibel pa e sanger di toro i kabritu kita pika.

⁵Pesei, ora ku E bin den mundu, E ta bisa: "Sakrifisio i ofrenda Bo no a desea, ma un kurpa Bo a prepara pa Mi;

⁶den ofrendanan kima i sakrifisionan pa pika Bo no tabatin plaser.

⁷E ora ei Mi a bisa: 'Mira, Mi a bin (den e rol ta para skirbi tokante di Mi) pa hasi Bo boluntat, O Dios.'"

⁸Prome El a bisa: "Sakrifisionan i ofrendanan i ofrendanan kima hente i sakrifisionan pa pika Bo no a desea, ni Bo no tabatin plaser den nan" (kualnan ta wordu ofresi segun Lei).

⁹Despues El a bisa: "Mira, Mi a bin pa hasi Bo boluntat." E ta kita e prome pa stablese e di dos.

¹⁰Pa medio di e boluntat aki nos a wordu santifika dor di e ofrenda di e kurpa di Jesu-Cristo un biaha pa semper.

¹¹I tur saserdote ta para diariamente pa sirbi i ofrese bes tras bes e mesun sakrifisionan, kualnan nunka por kita pika;

¹²ma E, siendo ku El a ofrese un sakrifisio so pa pika pa semper, a sinta na man drechi di Dios,

¹³sperando for di e tempu ei padilanti, te ora Su enemigunan wordu hasi un banki pa Su pianan.

¹⁴Pasobra pa medio di un ofrenda so El a hasi perfekto pa semper esnan ku ta wordu santifika.

¹⁵I Spiritu Santu tambe ta testifika na nos; pasobra despues di a bisa:

¹⁶"Esaki ta e aliansa ku lo Mi sera ku nan despues di e dianan ei, Senor ta bisa: lo Mi pone Mi leinan riba nan kurason, i den nan mente lo Mi skirbi nan." Despues E ta bisa:

¹⁷"I nan pikanan i nan inhustisianan lo Mi no korda mas."

¹⁸Awor kaminda tin pordon di e kosnan aki, no tin ofrenda pa pika mas.

¹⁹Pesei, rumannan, komo ku nos tin konfiansa pa drenta e luga santu pa medio di e sanger di Jesus,

²⁰pa medio di un kaminda nobo i bibu ku El a inougura pa nos dor di e velo, esta, Su karni,

²¹i komo ku nos tin un gran saserdote riba e kas di Dios,

²²laga nos hala serka ku un kurason sinsero yen di siguransa di fe, ku nos kurasonnan purifika di un mal konsenshi i nos kurpanan laba ku awa puru.

²³Laga nos tene firme na e konfeshon di nos speransa sin vasila, pasobra Esun ku a priminti ta fiel;

²⁴i laga nos konsidera kon pa stimula otro pa stima i hasi bon obra,

²⁵i no laga di asisti na nos mes reunionnan, manera ta kustumber di algun, ma enkurasha otro; i muchu mas ainda, ora boso ta mira ku e dia ta yegando serka.

²⁶Pasobra si nos sigui peka boluntariamente despues di a risibi e konosementu di e berdat, no ta keda sakrifisio pa pika mas,

²⁷sino un sierto ekspektativa teribel di huisio i e furia di un kandela ku lo kaba ku e atversarionan.

²⁸Ken ku pone e Lei di Moises un banda ta muri sin miserikordia riba testimonio di dos of tres testigu.

²⁹Kuantu mas pisa bo ta kere ku e kastigu mester ta pa esun ku a trapa e Yu di Dios bou di su pia, i ku a konsidera impuru e sanger di e aliansa, pa medio di kual el a wordu santifika, i a insulta e Spiritu di grasia?

³⁰Pasobra nos konose Esun ku a bisa: "Ta di Mi vengansa ta; Ami lo paga bek," i atrobe: "SENOR lo huzga Su pueblo."

³¹Ta un kos teribel pa kai den man di e Dios bibu.

³²Ma korda e dianan di prome aya, tempu ku, despues di a wordu ilumina, boso a soporta un gran lucha di sufrimentu,

³³parsialmente dor di wordu hasi un spektakulo publiko dor di reprochenan i tribulashonnan, i parsialmente dor di bira partisipante huntu ku esnan ku a wordu trata asina.

³⁴Pasobra boso a kompadese di e prezonan i a asepta ku goso e konfiskashon di boso propiedat, sabiendo ku boso tin pa boso mes un miho poseshon i un ku ta permanese.

³⁵Pesei, no tira boso konfiansa afo, kual tin un gran rekompensa.

³⁶Pasobra boso tin mester di perseveransia, pa ora boso a hasi e boluntat di Dios, boso risibi loke a wordu priminti.

³⁷Pasobra denter di masha poko tempu, "Esun ku ta pa bin, lo bin, i lo no tarda.

³⁸Ma e hustu lo biba pa medio di fe; i si e hal'atras, Mi alma no tin plaser den dje."

³⁹Ma nos no ta di esnan ku ta hal'atras pa destrukshon, sino di esnan ku tin fe pa preservashon di e alma.