Read Papantla Totonac Hebreonan 11 Bible Online

Hebreonan 11 - Papantla Totonac bible

Hebreonan 11

¹Awor fe ta e siguransa di kosnan ku hende ta spera, e konvikshon di kosnan ku hende no ta mira.

²Pasobra pa medio di esaki e hendenan di prome aya a hana aprobashon.

³Pa medio di fe nos ta komprende ku e mundunan a wordu prepara pa medio di e palabra di Dios, asina ku loke ta wordu mira no a wordu traha for di kosnan ku ta visibel.

⁴Pa medio di fe Abel a ofrese na Dios un miho sakrifisio ku Kain, dor di kual el a optene e testimonio ku e tabata hustu, ora Dios a duna testimonio di su regalonan. I pa medio di fe ainda e ta papia, ounke ku e ta morto.

⁵Pa medio di fe Enok a wordu traslada pa e no mira morto; i e no a wordu hana, pasobra Dios a traslad'e; pasobra el a optene e testimonio ku prome ku el a wordu traslada, e tabata agrada Dios.

⁶I sin fe ta imposibel pa agrad'E, pasobra esun ku bin serka Dios mester kere ku E ta, i ku E ta Esun ku ta rekompensa esnan ku ta busk'E.

⁷Pa medio di fe Noe, siendo spierta pa Dios tokante di kosnan ku no a wordu mira ainda, ku temor di Dios a prepara un arka pa salbashon di e hendenan di su kas, pa medio di kual el a kondena mundu i a bira un eredero di e hustisia ku ta segun fe.

⁸Pa medio di fe Abraham, ora ku el a wordu yama, a obedese dor di sali bai na un luga ku e tabata pa risibi komo erensia; i el a sali bai, sin sa unda e tabata bai.

⁹Pa medio di fe el a biba komo stranhero den e tera di promesa, manera den un tera strano, bibando den tent huntu ku Isaak i Jakob, ko-erederonan di e mesun promesa;

¹⁰pasobra e tabata buska e stat ku tin fundeshinan, di kual Dios ta e arkitekto i konstruktor.

¹¹Pa medio di fe Sara mes tambe a risibi abilidat pa konsebi, asta despues ku su tempu a pasa, komo ku el a konsidera fiel Esun ku a priminti;

¹²pesei tambe a nase di un homber, i e homber aki kasi morto kaba, mes tantu desendiente ku e streanan di shelu den kantidat--inkontabel manera e santu ku tin kantu di laman.

¹³Tur esakinan a muri den fe, sin a risibi e promesanan, ma ku a mira nan i a duna nan un bonbini for di un distansia, i ku a konfesa ku nan tabata stranhero i eksiliado riba tera.

¹⁴Pasobra esnan ku ta bisa kosnan asina ta bisa bon kla ku nan ta buskando un pais di nan mes.

¹⁵I di berdat, si nan tabata pensa riba e pais ei for di kual nan a sali, nan lo tabatin oportunidat pa bolbe.

¹⁶Ma awor nan ta desea un miho pais, esta, un pais selestial. Pesei Dios no tin berguensa di wordu yama nan Dios, pasobra El a prepara un stat pa nan.

¹⁷Pa medio di fe Abraham, ora ku el a wordu poni na prueba, a ofrese Isaak; i esun ku a risibi e promesanan tabata ofresiendo su yu unigenito;

¹⁸ta na dje a wordu bisa: "Ta dor di Isaak bo desendientenan lo wordu konta."

¹⁹El a konsidera ku Dios ta poderoso pa lanta hende asta for di morto; for di kual tambe, figurativamente bisa, el a risibie bek.

²⁰Pa medio di fe Isaak a bendishona Jakob i Esau tokante di kosnan ku ta bin.

²¹Pa medio di fe Jakob, ora ku e tabata muriendo, a bendishona kada un di e yu hombernan di Jose, i a adora Dios, mientras ku e tabata len riba kabes di su garoti.

²²Pa medio di fe Jose, ora ku e tabata muriendo, a menshona e eksodo di e yunan di Israel i a duna ordu tokante di su wesunan.

²³Pa medio di fe Moises su mayornan, despues ku el a nase, a ten'e skondi pa tres luna, pasobra nan a mira ku e tabata un bunita mucha; i nan no a tene miedu di e dekreto di rei.

²⁴Pa medio di fe Moises, ora ku el a krese bira grandi, a nenga di wordu yama yu di Farao su yu muhe,

²⁵skohiendo pa mas bien sufri maltrato huntu ku e pueblo di Dios, ku gosa di e plasernan pasahero di pika;

²⁶konsiderando e reproche di Cristo rikesanan mas grandi ku e tesoronan di Egipto, pasobra e tabatin su bista riba e rekompensa.

²⁷Pa medio di fe el a bai for di Egipto, sin tene miedu di e furia di rei; pasobra el a keda firme, komo si fuera e tabata mira Esun ku ta invisibel.

²⁸Pa medio di fe el a selebra Pasku i e sprengumentu di e sanger, pa esun ku a destrui e primogenitonan no mishi ku e primogenitonan di Israel.

²⁹Pa medio di fe nan a pasa dor di Laman Kora komo si fuera ta riba tera seku nan tabata pasa; i e egipsionan, ora nan a trata di hasi meskos, a hoga.

³⁰Pa medio di fe e murayanan di Jeriko a kai, despues ku e pueblo a kana shete dia largu ront di nan.

³¹Pa medio di fe e prostituta Rahab no a perese huntu ku esnan ku tabata desobedesido, despues ku el a risibi e spionnan den pas.

³²I kiko mas lo mi bisa? Pasobra lo mi no tin basta tempu pa mi konta di Gideon, Barak, Samson, Jefta, di David, Samuel i e profetanan,

³³kendenan pa medio di fe a konkista reinonan, a ehekuta hustisia, a optene promesanan, a sera boka di leonnan,

³⁴a paga e poder di kandela, a skapa for di e filo di spada, for di den debilidat a wordu hasi fuerte, a bira poderoso den guera, a pone ehersitonan stranhero hui.

³⁵Muhenan a hana nan mortonan bek pa medio di resurekshon; i otronan a wordu tortura, sin asepta nan liberashon, pa nan por a optene un miho resurekshon;

³⁶i otronan a pasa den prueba di bofon i sota di karbachi, si, tambe kadena i prizon.

³⁷Nan a wordu piedra, nan a wordu gezag na dos, nan a wordu tenta, nan a wordu mata ku spada; nan a kana ront, bisti na kueru di karne, na kueru di kabritu, siendo bashi, afligi, maltrata

³⁸(hendenan ku mundu no tabata digno di nan), nan tabata dwal den desiertonan i serunan, kuebanan i burakunan den tera.

³⁹I tur esakinan ku a hana aprobashon pa medio di nan fe no a risibi loke a wordu priminti,

⁴⁰pasobra Dios a provee algu miho pa nos, pa nan no wordu hasi perfekto sin nos.