Read Papantla Totonac Hebreonan 12 Bible Online

Hebreonan 12 - Papantla Totonac bible

Hebreonan 12

¹Pesei, komo ku nos tin un nubia asina grandi di testigunan ta rondona nos, laga nos tambe pone un banda tur strobashon, i e pika ku ta mara nos asina fasil, i ku perseveransia laga nos kore e kareda ku ta poni nos dilanti,

²fihando nos wowo riba Jesus, e outor i kumplido di fe, Kende, pa motibu di e goso poni Su dilanti, a soporta e sufrimentu di krus, sin hasi kaso di berguensa, i a sinta na man drechi di e trono di Dios.

³Konsidera Esun ku a soporta tal hostilidat di pekadonan kontra Su mes, pa boso no kansa i perde animo.

⁴Boso no a resisti ainda te na e punto di drama sanger den boso lucha kontra pika;

⁵i boso a lubida e spiertamentu ku a wordu dirigi na boso komo yunan: "Mi yu, no menospresia e disiplina di SENOR, ni desmaya ora ku E reprendebo;

⁶pasobra esnan ku SENOR ta stima, E ta disiplina, i E ta suta tur yu ku E ta risibi."

⁷Komo disiplina boso tin ku soporta esaki; Dios ta trata ku boso manera ku yu; pasobra kual yu no ta risibi disiplina serka su tata?

⁸Ma si boso ta sin disiplina, di kual tur a bira partisipante, e ora ei boso ta yu djafo i no yu legitimo.

⁹Ademas, nos tabatin tatanan terenal pa disiplina nos i nos tabata respeta nan; anto nos lo no mester somete nos mes muchu mas ainda na e Tata di spiritunan, i biba?

¹⁰Pasobra nan a disiplina nos pa un tempu kortiku, manera nan tabata hana ta bon, ma E ta disiplina nos pa nos bon, pa nos por komparti den Su santidat.

¹¹Na e momento mes ningun disiplina no ta parse di ta kousa di goso, sino di dolo; ma pa esnan ku a wordu entrena dor di dje, despues e ta duna e fruta pasifiko di hustisia.

¹²Pesei, fortalese e mannan ku ta swak i e rudianan ku ta debil,

¹³i traha berehanan stret pa boso pianan, pa loke ta lam no sali for di su luga, ma mas bien wordu kura.

¹⁴Aspira pa tin pas ku tur hende, i santifikashon, sin kual ningun hende lo no mira Senor.

¹⁵Mira pa ningun hende no keda sin alkansa e grasia di Dios; pa ningun rais di amargura no spreit i kousa problema, i dor di esaki hopi wordu kontamina;

¹⁶pa no tin ningun hende inmoral of sin Dios manera Esau, kende a bende su mes derecho di nasementu pa un solo kuminda.

¹⁷Pasobra boso sa ku asta despues, ora ku el a desea di ereda e bendishon, el a wordu rechasa, pasobra e no a hana oportunidat pa repenti, maske el a buska esaki ku lagrima.

¹⁸Pasobra boso no a yega na un seru ku hende por mishi kune i na un kandela tur na flam, i na skuridat i tiniebla i warwaru,

¹⁹i na e zonidu duru di trompet i e zonidu di palabranan, kual zonidu tabata di tal forma ku esnan ku a tende a roga pa ni un palabra mas no wordu papia ku nan.

²⁰Pasobra nan no por a soporta e ordu: "Si asta un bestia mishi ku e seru, e mester wordu piedra."

²¹I e bista tabata asina teribel, ku Moises a bisa: "Mi ta yen di miedu i temblamentu."

²²Ma boso a yega na Seru Sion i na e stat di e Dios bibu, e Jerusalem selestial, i na miyares di angelnan,

²³na e asamblea general i iglesia di e primogenitonan, kendenan ta inskribi den shelu, i na Dios, e Hues di tur hende, i na e spiritunan di hendenan hustu ku a wordu hasi perfekto,

²⁴i na Jesus, e Mediador di un aliansa nobo, i na e sanger ku a wordu gesprengu, ku ta papia miho kosnan ku e sanger di Abel ta papia.

²⁵Mira pa boso no rechasa Esun ku ta papia. Pasobra si eseinan no a skapa ora nan a rechasa esun ku a spierta nan riba tera, kuantu menos nos lo skapa si nos bira bai for di Esun ku ta spierta for di shelu.

²⁶I e tempu ei Su bos a sakudi tera, ma awor El a priminti, bisando: "Un biaha mas lo Mi sakudi no tera so, sino shelu tambe."

²⁷I e ekspreshon aki: "Un biaha mas," ta indika e kitamentu di e kosnan ei ku por wordu sakudi, esta, kosnan ku a wordu krea, pa e kosnan ku no por wordu sakudi por keda.

²⁸Pesei, komo ku nos ta risibi un reino ku no por wordu sakudi, laga nos mustra gratitut, pa medio di kual nos por ofrese na Dios un sirbishi aseptabel ku reverensia i temor;

²⁹pasobra nos Dios ta un kandela konsumidor.