Read Papantla Totonac Hebreonan 13 Bible Online

Hebreonan 13 - Papantla Totonac bible

Hebreonan 13

¹Laga amor di ruman kontinua.

²No laga di mustra hospitalidat na stranhero, pasobra dor di hasi esaki algun hende a entretene angelnan sin sa.

³Korda riba e prezonan, komo si fuera boso ta huntu ku nan den prizon, i riba esnan ku ta wordu maltrata, komo ku boso mes tambe ta den e kurpa.

⁴Laga matrimonio wordu onra pa tur hende, i laga e kama matrimonial ta sin mancha; pasobra Dios lo huzga fornikadonan i adulteronan.

⁵Laga boso karakter ta liber di amor pa plaka i sea kontentu ku loke boso tin; pasobra E mes a bisa: "Nunka lo Mi no bandonabo, i nunka lo Mi no lagabo desampara,"

⁶asina ku nos ta bisa ku tur konfiansa: "SENOR ta mi yudado, lo mi no tin miedu. Kiko hende por hasimi?"

⁷Korda riba esnan ku a guia boso, ku a papia e palabra di Dios ku boso; i konsiderando e resultado di nan kondukta, imita nan fe.

⁸Jesu-Cristo ta meskos ayera i awe i pa semper.

⁹No laga boso wordu hiba p'aki p'aya dor di tur sorto di sinansa strano; pasobra ta bon pa e kurason wordu fortifika dor di grasia, no dor di kuminda, pa medio di kual esnan ku tabata okupa nan mes ku esaki no a wordu benefisia.

¹⁰Nos tin un altar, for di kual esnan ku ta sirbi e tabernakel no tin derecho di kome.

¹¹Pasobra e kurpanan di e animalnan ei, di kualnan e sumosaserdote ta hiba e sanger den e luga santu komo un ofrenda pa pika, ta wordu kima pafo di e kampamentu.

¹²Pesei Jesus tambe, pa E por a santifika e pueblo pa medio di Su mes sanger, a sufri pafo di e porta di stat.

¹³Pa e motibu aki, laga nos bai serka djé pafo di e kampamentu, kargando Su reproche.

¹⁴Pasobra aki nos no tin un stat duradero, ma nos ta buskando e stat ku tin ku bin.

¹⁵Dor di djé anto, laga nos ofrese kontinuamente un sakrifisio di alabansa na Dios, esta, e fruta di lepnan ku ta duna gradisimentu na Su nomber.

¹⁶I no laga di hasi bon i di komparti ku otro; pasobra sorto di sakrifisionan asina ta agrada Dios.

¹⁷Obedese boso lidernan i somete boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i no ku tristesa, pasobra esaki lo no ta bentahoso pa boso.

¹⁸Hasi orashon pa nos, pasobra nos ta sigur ku nos tin un bon konsenshi, ku deseo pa komporta nos mes den tur kos na un manera onorabel.

¹⁹I mi ta roga boso mas ainda pa hasi esaki, pa mi por wordu debolbi na boso mas lihe.

²⁰Awor ku e Dios di pas, Kende a lanta for di e mortonan e gran Wardado di e karnenan dor di e sanger di e aliansa eterno, esta, Jesus nos Senor,

²¹ekipa boso pa hasi Su boluntat den tur kos bon, obrando den nos loke ta agradabel den Su bista, dor di Jesu-Cristo, na Kende sea e gloria pa semper i semper. Amen.

²²Ma mi ta roga boso, rumannan, soporta e palabra di eksortashon aki, pasobra mi a skirbi boso en breve.

²³Tuma nota ku nos ruman Timoteo a wordu libra di prizon, ku kende, si e bin pronto, lo mi bishita boso.

²⁴Saluda tur boso lidernan i tur e santunan. Esnan di Italia ta saluda boso.

²⁵Grasia sea ku boso tur. Amen.