Read Papantla Totonac Hebreonan 2 Bible Online

Hebreonan 2 - Papantla Totonac bible

Hebreonan 2

¹Pa e motibu aki nos mester paga muchu mas atenshon na loke nos a tende, pa nos no aparta nos for di e kaminda.

²Pasobra si e palabra papia pa medio di angelnan a keda proba di ta firme, i tur transgreshon i desobedensia a risibi pago hustu,

³kon nos lo skapa si nos neglisha un salbashon asina grandi ku na prome luga a wordu papia dor di Senor, i a wordu konfirma na nos dor di esnan ku a tende,

⁴mientras ku Dios tambe tabata duna testimonio huntu ku nan, tantu pa medio di senalnan komo pa medio di maraviyanan i pa medio di varios sorto di milagernan i pa medio di donnan di Spiritu Santu segun Su mes boluntat.

⁵Pasobra no ta na angelnan El a somete e mundu ku ta bin, di kual nos ta papiando.

⁶Ma un hende a testifika un kaminda, bisando: "Kiko hende ta, ku Bo ta korda riba dje? Of yu di hende, ku Bo ta hasi kaso di dje?

⁷Pa un poko tempu Bo a hasie menos ku e angelnan; Bo a koron'e ku gloria i onor, i Bo a pon'e riba e obranan di Bo mannan;

⁸tur kos Bo a somete bou di su pianan." Pasobra dor di somete tur kos na dje, E no a laga nada ku no ta keda someti na dje. Ma awor nos no ta mira tur kos someti na dje ainda.

⁹Ma nos ta mira Esun ku pa un poko tempu a wordu hasi menos ku e angelnan, esta Jesus, pa motibu di e sufrimentu di morto korona ku gloria i onor, ku pa medio di e grasia di Dios E por eksperensia morto pa tur hende.

¹⁰Pasobra tabata kumbini Esun, pa Kende tur kos ta eksisti i pa medio di Kende tur kos ta eksisti, dor di trese hopi yu na gloria, pa perfekshona e outor di nan salbashon pa medio di sufrimentunan.

¹¹Pasobra tantu Esun ku ta santifika komo esnan ku ta wordu santifika, tur ta bin di un Tata, pa kual motibu E no tin berguensa di yama nan ruman,

¹²bisando: "Lo Mi proklama Bo nomber na Mi rumannan, meimei di e kongregashon lo Mi kanta Bo alabansa."

¹³I atrobe: "Lo Mi pone Mi konfiansa den djé." I atrobe: "Mira, Ami i e yunan ku Dios a dunaMi."

¹⁴Asina anto, komo ku e yunan ta komparti den karni i sanger, E mes tambe a tuma parti na e mesun manera, asina ku pa medio di morto E por a destrui esun ku tabatin poder riba morto, esta, diabel,

¹⁵i por a libra esnan ku pa miedu di morto tabata someti na sklabitut henter nan bida.

¹⁶Pasobra siguramente no ta na angelnan E ta duna yudansa, ma E ta duna yudansa na e desendientenan di Abraham.

¹⁷Pesei E mester a wordu hasi igual ku Su rumannan den tur kos, pa E por a bira un sumosaserdote miserikordioso i fiel den kosnan ku tin di hasi ku Dios, pa hasi ekspiashon pa e pikanan di e pueblo.

¹⁸Pasobra komo ku E mes a wordu tenta den loke El a sufri, E por bin na yudansa di esnan ku ta wordu tenta.