Read Papantla Totonac Hebreonan 3 Bible Online

Hebreonan 3 - Papantla Totonac bible

Hebreonan 3

¹Pesei, rumannan santu, partisipantenan den un yamada selestial, fiha boso pensamentunan riba Jesus, e Apostel i Sumosaserdote di nos konfeshon.

²E tabata fiel na Esun ku a nombr'E, meskos ku Moises tambe tabata fiel den henter Su kas.

³Pasobra El a wordu konsidera digno di mas gloria ku Moises, meskos ku esun ku ta traha e kas tin mas onor ku e kas.

⁴Pasobra tur kas ta wordu traha dor di un hende, ma Esun ku a traha tur kos ta Dios.

⁵Awor Moises tabata fiel den henter Su kas manera un sirbido, komo un testimonio di e kosnan ei ku lo a wordu papia despues;

⁶ma Cristo tabata fiel manera un Yu riba Su mes kas, Kende Su kas nos ta, si nos tene firme na e konfiansa i na e gloria di e speransa te na fin.

⁷Pesei, meskos ku Spiritu Santu ta bisa: "Awe, si boso tende Su bos,

⁸no hasi boso kurason duru, manera tempu ku nan a probokaMi, manera den e dia di prueba den desierto,

⁹kaminda boso tatanan a poneMi na prueba dor di probokaMi, i a mira Mi obranan durante di kuarenta ana.

¹⁰Pesei mi tabata rabia ku e generashon aki, i a bisa: 'Semper nan ta desvia den nan kurason; i nan no tabata konose Mi kamindanan';

¹¹manera Mi a hura den Mi furia, 'Nan lo no drenta den Mi sosiegu.'"

¹²Tene kuidou, rumannan, pa no tin den ningun di boso un kurason malbado i inkredulo, dor di aleha for di e Dios bibu.

¹³Ma enkurasha otro dia tras dia, tanten ku por papia di "Awe" ainda, pa ningun di boso no wordu enduresi dor di e engano di pika.

¹⁴Pasobra nos a bira partisipante di Cristo, si nos tene firme na e prinsipio di nos siguransa te na fin,

¹⁵mientras ku ta wordu bisa: "Awe, si boso tende Su bos, no hasi boso kurason duru, manera tempu ku nan a probokaMi."

¹⁶Pasobra ta ken a probok'E ora nan a tende? Di berdat, no tabata tur esnan ku a sali for di Egipto, guia pa Moises?

¹⁷I ta ku ken E tabata rabia kuarenta ana largu? No tabata ku esnan ku a peka, kende nan kurpanan a kai den desierto?

¹⁸I ta na ken El a hura ku nan lo no a drenta den Su sosiegu, sino na esnan ku tabata desobedesido?

¹⁹I asina nos ta mira ku nan no por a drenta pa motibu di inkredulidat.