Read Papantla Totonac Hebreonan 4 Bible Online

Hebreonan 4 - Papantla Totonac bible

Hebreonan 4

¹Pesei, laga nos tin temor, pa, mientras ku ta keda un promesa ainda pa drenta den Su sosiegu, no parse ku un di boso a keda sin alkansa esaki.

²Pasobra di berdat bon nobo a wordu predika na nos, meskos ku na nan tambe; ma e palabra ku nan a tende no tabata di probecho pa nan, pasobra e no a wordu kombina ku fe den esnan ku a tende.

³Pasobra nos ku a kere ta drenta den e sosiegu ei, meskos ku El a bisa: "Manera Mi a hura den Mi furia: 'Nan lo no drenta den Mi sosiegu,'" ounke Su trabounan a keda kla desde fundashon di mundu.

⁴Pasobra asin'aki El a bisa un kaminda tokante di e di shete dia: "I Dios a sosega riba e di shete dia di tur Su trabounan";

⁵i atrobe den e parti aki: "Nan lo no drenta den Mi sosiegu."

⁶Pesei, komo ku ta keda pa algun drenta e sosiegu ei, i esnan na kendenan antes bon nobo a wordu predika no a drenta pa motibu di desobedensia,

⁷atrobe E ta fiha un sierto dia, "Awe", bisando pa medio di David despues di tantu tempu, meskos ku a wordu bisa antes: "Awe, si boso tende Su bos, no hasi boso kurason duru."

⁸Pasobra si Josue a duna nan sosiegu, E lo no a papia di un otro dia despues di esei.

⁹Pesei anto, ta keda un sosiegu di Sabat pa e pueblo di Dios.

¹⁰Pasobra esun ku a drenta den Su sosiegu, e mes tambe a sosega di su trabounan, manera Dios a sosega di esnan di djé.

¹¹Pesei, laga nos ta diligente pa drenta den e sosiegu ei, pa ningun hende no kai dor di sigui e mesun ehempel di desobedensia.

¹²Pasobra e palabra di Dios ta bibu i aktivo i mas skerpi ku kualkier spada di dos filo, i ta penetra te na e divishon di alma i spiritu, i di skarnir i tuti, i ta kapas pa huzga e pensamentunan i intenshonnan di kurason.

¹³I no tin ningun kriatura skondi pa Su bista, ma tur kos ta habri i bisto dilanti di wowo di Esun ku nos tin di aber kuné.

¹⁴Komo ku nos tin anto un gran Sumosaserdote, Kende a pasa dor di e shelunan, Jesus e Yu di Dios, laga nos tene firme na nos konfeshon.

¹⁵Pasobra nos no tin un Sumosaserdote ku no por kompadese di nos debilidatnan, sino Un ku a wordu tenta den tur kos meskos ku nos, ma tog sin pika.

¹⁶Pesei, laga nos aserka e trono di grasia ku konfiansa, pa nos risibi miserikordia i hana grasia pa yuda den tempu di nesesidat.