Read Papantla Totonac Hebreonan 5 Bible Online

Hebreonan 5 - Papantla Totonac bible

Hebreonan 5

¹Pasobra tur sumosaserdote skohi for di den hende ta wordu nombra pa benefisio di hende den kosnan ku ta pertenese na Dios, pa ofrese tantu regalo komo sakrifisio pa pika;

²e por tin pasenshi ku esnan ignorante i esnan ku ta den eror, komo ku e mes tambe ta rondona di debilidat;

³i pa motibu di esaki e ta obliga di ofrese sakrifisionan pa pikanan, tantu pa e pueblo, komo pa su mes tambe.

⁴I ningun hende no ta tuma e onor pa su mes, ma ta risibi esaki ora ku e wordu yama dor di Dios, manera Aaron a wordu yama.

⁵Asina Cristo tampoko no a glorifika Su mes pa bira Sumosaserdote, ma Esun ku a bis'E: "Abo ta Mi Yu, awe Mi a engendraBo";

⁶manera E ta bisa tambe na un otro luga den Skritura: "Bo ta Saserdote pa semper segun e ordu di Melkisedek."

⁷Tempu ku E tabata den karni, E tabata ofrese orashon i suplika ku gran sklamashon i lagrima na Esun ku ta kapas pa salb'E for di morto, i El a wordu tendi pa motibu di Su piedat.

⁸Ounke ku E tabata Yu, El a sina obedensia dor di e kosnan ku El a sufri.

⁹I despues di a wordu hasi perfekto, El a bira pa tur esnan ku ta obedes'E, e outor di salbashon eterno,

¹⁰siendo yama pa Dios komo Sumosaserdote segun e ordu di Melkisedek.

¹¹Tokante di djé nos tin hopi di bisa, i ta difisil pa splika, komo ku boso a bira floho pa tende.

¹²Pasobra ounke pa e tempu aki ya boso mester tabata maestronan kaba, boso tin mester di un hende pa sina boso e prinsipionan elemental di e palabra di Dios tur di nobo, i boso mester di lechi i no kuminda solido.

¹³Pasobra tur ku ta biba di lechi so ta sin eksperensia den asunto di hustisia, pasobra ta un bebi e ta.

¹⁴Ma kuminda solido ta pa hende madura, kendenan, pa motibu di praktika, tin nan mente entrena pa diserni loke ta bon i loke ta malu.