Read Papantla Totonac Hebreonan 6 Bible Online

Hebreonan 6 - Papantla Totonac bible

Hebreonan 6

¹Pesei, lagando e sinansa elemental tokante di e Cristo, laga nos sigui dilanti pa yega na madures, i no pone atrobe un fundeshi di repentimentu di obranan morto i di fe pa ku Dios,

²di doktrina di boutismonan i di ponementu di man, di resurekshon di e mortonan i di huisio eterno.

³I esaki nos lo hasi, si Dios permit!

⁴Pasobra den kaso di esnan ku un tempu a wordu ilumina i ku a purba e don selestial, i ku a bira partisipantenan di Spiritu Santu,

⁵i ku a purba e bon palabra di Dios i e podernan di e siglo ku ta bin,

⁶i despues a kai, ta imposibel pa trese nan bek na repentimentu, komo ku nan ta bolbe krusifika e Yu di Dios pa nan mes i ta pon'E na berguensa publiko.

⁷Pasobra suela ku ta bebe e awaseru ku ta kai ku frekuensia riba dje, i ta produsi vegetashon ku ta util pa esnan pa kendenan benefisio e ta wordu kultiva tambe, ta risibi un bendishon di Dios;

⁸ma si e ta produsi sumpina i bringamosa e no bal nada i ta serka di wordu maldishona i su fin ta pa wordu kima.

⁹Ma stimanan, maske nos ta papia na e manera aki, nos ta konvensi di kosnan miho tokante di boso, i kosnan ku ta pertenese na salbashon.

¹⁰Pasobra Dios no ta inhustu pa lubida boso trabou i e amor ku boso a mustra pa Su nomber, dor ku boso a sirbi i ainda ta sirbi e santunan.

¹¹I nos ta desea ku kada un di boso lo mustra e mesun diligensia pa asina realisa e siguransa kompleto di speransa te na fin,

¹²pa boso no flakia, ma pa boso ta imitadonan di esnan ku pa medio di fe i pasenshi ta ereda e promesanan.

¹³Pasobra tempu ku Dios a hasi e promesa na Abraham, komo ku E no por a hura dilanti di ningun mas grandi kuné, El a hura pa Su mes,

¹⁴bisando: "Siguramente lo Mi bendishonabo i siguramente lo Mi multiplikabo."

¹⁵I asina, despues di a spera ku pasenshi, el a optene e promesa.

¹⁶Pasobra hende ta hura pa un mas grandi ku nan mes, i pa nan un huramentu duna komo konfirmashon ta pone un fin na tur diskushon.

¹⁷Na mesun manera Dios, deseando mas ainda pa mustra na e erederonan di e promesa Su proposito inkambiabel, a konfirma esaki pa medio di un huramentu,

¹⁸pa dor di dos kos inkambiabel, den kualnan ta imposibel pa Dios gana, nos por tin fuerte enkurashamentu, nos ku a hui pa buska refugio dor di gara e speransa ku ta poni nos dilanti.

¹⁹E speransa aki nos tin komo un anker di e alma, un speransa sigur i firme, un ku ta drenta tras di e velo,

²⁰kaminda Jesus, Kende a bai nos dilanti, a drenta pa nos. El a bira Sumosaserdote pa semper, segun e ordu di Melkisedek.