Read Papantla Totonac Hebreonan 8 Bible Online

Hebreonan 8 - Papantla Totonac bible

Hebreonan 8

¹Awor e punto prinsipal di loke a wordu bisa ta esaki: nos tin tal Sumosaserdote, Kende a tuma Su puesto na man drechi di e trono di e Mahestat den e shelunan,

²un Sirbido den e santuario i den e tabernakel berdadero, kual Senor a lanta, i no hende.

³Pasobra tur sumosaserdote ta keda nombra pa ofrese tantu regalo komo sakrifisio; pesei ta nesesario ku e Sumosaserdote aki tambe tin algu di ofrese.

⁴Awor si E tabata riba tera, E lo no tabata un saserdote, komo ku tin saserdotenan ku ta ofrese e regalonan segun Lei,

⁵kendenan ta sirbi un kopia i sombra di e kosnan selestial, meskos ku Moises a wordu spierta pa Dios, tempu ku e tabata bai lanta e tabernakel; pasobra E ta bisa: "Mira pa bo traha tur kos konforme e diseno ku a wordu mustra na bo riba e seru."

⁶Ma awor El a optene un sirbishi mas ekselente, komo ku E ta tambe e Mediador di un miho aliansa, kual a wordu stables! riba miho promesanan.

⁷Pasobra si e prome aliansa ei tabata sin fayo, lo no tabatin mester di a buska un di dos.

⁸Ma hanando fayo den nan, E ta bisa: "Ata, e dianan ta bin, SENOR ta bisa, ku lo Mi sera un aliansa nobo ku e kas di Israel i ku e kas di Juda;

⁹no manera e aliansa ku Mi a sera ku nan tatanan riba e dia ku Mi a kohe nan na nan man, pa saka nan for di tera di Egipto; pasobra nan no a sigui den Mi aliansa, i Mi no a hasi kaso di nan, SENOR ta bisa.

¹⁰Pasobra esaki ta e aliansa ku lo Mi sera ku e kas di Israel despues di e dianan ei, SENOR ta bisa: lo Mi pone Mi leinan den nan mente, i lo Mi skirbi nan riba nan kurason. I Ami lo ta nan Dios, i nan lo ta Mi pueblo.

¹¹I ningun di nan lo no sina su prohimo, i ningun di nan su ruman, bisando: 'Konose Senor,' pasobra tur lo konoseMi, for di esun di mas menos te na esun di mas grandi di nan.

¹²Pasobra lo Mi tin miserikordia di nan inikidatnan, i lo Mi no korda nan pikanan mas."

¹³Ora ku El a bisa: "Un aliansa nobo," El a hasi esun di prome bira antikua. Ma tur loke bira antikua i bieu ta serka di disparse.