Read Papantla Totonac Hebreonan 9 Bible Online

Hebreonan 9 - Papantla Totonac bible

Hebreonan 9

¹Awor tambe e prome aliansa tabatin reglanan di adorashon divino i e santuario terenal.

²Pasobra tabatin un tabernakel prepara, e parti prome, den kual tabatin e kandela i e mesa i e pan di Presensia; esaki ta wordu yama e luga santu.

³I tras di e di dos velo tabatin un tabernakel ku ta wordu yama e Santisimo,

⁴kual tabatin un altar di sensia, traha di oro, i e arka di aliansa, kubri ku oro na tur banda, den kual tabatin un butishi di oro ku e mana aden, i Aaron su bara ku a floria i e tablanan di e aliansa.

⁵I riba dje tabatin e kerubinnan di gloria ku tabata sombra e propisiatorio; ma awor nos no por papia di e kosnan aki den detaye.

⁶Awor ora ku e kosnan aki a wordu prepara asina, e saserdotenan kontinuamente ta drenta den e parti prome di e tabernakel, kumpliendo ku e adorashon divino,

⁷ma den e di dos solamente e sumosaserdote ta drenta, un biaha pa ana, no sin sanger, kual e ta ofrese pa su mes i pa e pikanan di e pueblo ku nan a komete den ignoransia.

⁸Spiritu Santu ta duna di komprende esaki, ku e kaminda pa e luga santu no a wordu habri ainda, mientras ku e tabernakel di pafo t'ei ainda.

⁹Esaki ta un simbolo pa e tempu aktual, den kual tantu regalo komo sakrifisio ta wordu ofresi, kualnan no por hasi e adorado perfekto den su konsenshi,

¹⁰komo ku nan tin di hasi solamente ku kuminda, bibida i varios labamentu, reglanan pa e kurpa, imponi te na tempu di reformashon.

¹¹Ma ora Cristo a parese komo un sumosaserdote di e kosnan bon ku mester bin, El a drenta pa medio di e tabernakel mas grandi i mas perfekto, no traha ku man, esei kier men, no di e kreashon aki,

¹²i no pa medio di e sanger di kabritu i bishe, ma pa medio di Su mes sanger El a drenta den e luga santu un biaha pa semper, siendo ku El a optene redenshon eterno kaba.

¹³Pasobra si e sprengumentu di sanger di kabritu i toro i di e shinishi di un bishe muhe, riba esnan ku a wordu kontamina, ta santifika pa purifikashon di e karni,

¹⁴kuantu mas e sanger di Cristo, Kende, pa medio di e Spiritu eterno, a ofrese Su mes sin defekto na Dios, lo purifika boso konsenshi di obranan morto pa sirbi e Dios bibu?

¹⁵I pa e motibu aki E ta e Mediador di un aliansa nobo, pa esnan ku a wordu yama por risibi e promesa di e erensia eterno--awor ku un morto a tuma luga pa e redenshon di e transgreshonnan ku a wordu kometi bou di e prome aliansa.

¹⁶Pasobra kaminda tin un testament, morto di esun ku a trah'e ta nesesario.

¹⁷Pasobra un testament ta valido solamente despues ku hende muri, pasobra nunka e no ta drenta na vigor tanten ku esun ku a trah'e ta na bida.

¹⁸Pesei ni e prome (testament) no a wordu inougura sin sanger.

¹⁹Pasobra ora kada mandamentu a wordu partisipa pa medio di Moises na henter e pueblo segun Lei, el a kohe e sanger di e bishenan i e kabritunan, ku awa, lana skarlata i hisop, i a sprengu tantu e buki mes komo henter e pueblo,

²⁰bisando: "Esaki ta e sanger di e aliansa ku Dios a ordena boso."

²¹I na mes manera el a sprengu tantu e tabernakel komo tur e artikulonan-di-uzo di e sirbishi ku e sanger.

²²I segun Lei, kasi tur kos ta wordu purifika ku sanger, i sin dramamentu di sanger no tin pordon.

²³Pesei tabata nesesario pa e kopianan di e kosnan den e shelunan wordu purifika ku e sakrifisionan aki, ma e kosnan selestial mes ku miho sakrifisionan ku esakinan.

²⁴Pasobra Cristo no a drenta den un luga santu traha ku man, djis un kopia di esun berdadero, ma den shelu mes, awor pa parese den e presensia di Dios pa nos;

²⁵tampoko E no tabatin mester di ofrese Su mes hopi biaha, manera e sumosaserdote ta drenta den e luga santu ana aden ana afo ku sanger ku no ta di su mes.

²⁶Di otro manera E lo mester a sufri hopi biaha desde e fundashon di mundu; ma awor un biaha so na kumplimentu di e siglonan El a wordu manifesta pa kita pika pa medio di e sakrifisio di Su mes.

²⁷I meskos ku hende ta destina pa muri un biaha so i despues di esaki ta bin huisio,

²⁸asina Cristo tambe, Kende a wordu ofresi un biaha so pa karga e pikanan di hopi hende, lo parese pa di dos biaha, no pa karga pika, ma pa salbashon di esnan ku ta sper'E.