Read Papantla Totonac Santiago 1 Bible Online

Santiago 1 - Papantla Totonac bible

Santiago 1

¹Santiago, un sirbido di Dios i di Senor Jesu-Cristo, Na e diesdos tribunan ku ta plama den stranheria, Saludo.

²Konsidera esaki komo puru goso, mi rumannan, ora boso hana boso mes den diferente pruebanan,

³sabiendo ku e prueba di boso fe ta produsi perseveransia.

⁴I laga perseveransia tin su resultado perfekto, pa boso por ta perfekto i kompleto, sin falta di nada.

⁵Ma si kualkier di boso falta sabiduria, lagu'e pidi Dios, Kende ta duna na tur hende generosamente i sin reproche, i esaki lo wordu duna na dje.

⁶Ma lagu'e pidi den fe sin ningun duda, pasobra esun ku duda ta manera un ola di laman ku ta wordu lastra i tira dor di bientu.

⁷Pasobra no laga e hende ei spera ku e lo risibi algu di Senor,

⁸siendo un hende di kurason dobel, inkonstante den tur su kamindanan.

⁹Ma laga e ruman ku ta den sirkumstansia umilde gloria den su posishon haltu;

¹⁰i laga e hende riku gloria den su umiyashon, pasobra manera yerba ku ta floria e lo muri bai.

¹¹Pasobra solo ta sali ku un bientu kayente i ta seka e yerba; i su flor ta kai, i e bunitesa di su aparensia ta keda destrui; asina tambe e hende riku lo marchita den su empenonan.

¹²Bendishona ta un hende ku ta persevera den prueba; pasobra unabes ku el a pasa e prueba, e lo risibi e korona di bida, ku Senor a priminti na esnan ku ta stim'E.

¹³No laga ningun hende bisa ora ku e wordu tenta: "Mi ta wordu tenta dor di Dios"; pasobra Dios no por wordu tenta dor di maldat, i E mes no ta tenta ningun hende.

¹⁴Ma kada un ta wordu tenta ora ku e wordu atrai i sedusi dor di su mes pashon.

¹⁵Anto ora pashon konsebi, e ta duna lus na pika; i ora pika keda kumpli, e ta produsi morto.

¹⁶No sea gana, mi rumannan stima.

¹⁷Tur bon regalo i tur don perfekto ta for di ariba, i ta baha bin for di e Tata di lusnan, serka Kende no tin variashon ni sombra di kambio.

¹⁸Segun Su boluntat El a hasi nos nase dor di e palabra di berdat, pa nos por ta, den un sentido, e prome frutanan entre Su kriaturanan.

¹⁹Komprende esaki, mi rumannan stima. Tur hende mester ta lihe pa tende, no lihe pa papia i no lihe pa rabia;

²⁰pasobra rabia di hende no ta produsi e hustisia di Dios.

²¹Pesei, poniendo un banda tur sushedat i tur loke ta keda di maldat, den umildat risibi e palabra ku a wordu planta den boso, kual por salba boso almanan.

²²Ma sea kumplidonan di e palabra i no solamente tendedonan ku ta gana nan mes.

²³Pasobra si un hende ta tendedo di e palabra i no kumplido, e ta manera un hende ku ta wak su kara natural den spil;

²⁴pasobra unabes ku el a wak su mes i a bai, el a lubida mesora kon e tabata.

²⁵Ma esun ku fiha su bista riba e lei perfekto, e lei di libertat, i ta permanese den dje, sin bira un tendedo lubidado, sino un kumplido berdadero, e hende aki lo ta bendishona den loke e ta hasi.

²⁶Si un hende ta kere ku e ta religioso i tog no ta frena su lenga, ma ta gana su mes kurason, e hende aki su religion ta sin balor.

²⁷Esaki ta e religion puru i sin mancha den bista di nos Dios i Tata: bishita werfano i biuda den nan aflikshon, i konserva bo mes liber di mancha di mundu.