Read Papantla Totonac Santiago 3 Bible Online

Santiago 3 - Papantla Totonac bible

Santiago 3

¹No laga hopi di boso bira sinado, mi rumannan, sabiendo ku komo tal nos lo wordu huzga ku mas severidat.

²Pasobra nos tur ta trompeka na hopi manera. Si un hende no ta trompeka den loke e ta bisa, e ta un hende perfekto, kapas pa frena henter e kurpa tambe.

³Awor si nos pone frena den boka di e kabainan pa nan obedese nos, nos ta dirigi henter nan kurpa tambe.

⁴Mira, e barkunan tambe, ounke nan ta asina grandi i ta wordu hiba pa bientunan fuerte, tog ta wordu dirigi pa medio di un timon masha chikitu, na unda ku e sturman ta hiba gustu.

⁵Asina tambe e lenga ta un parti chikitu di e kurpa i tog e ta gaba di kosnan grandi. Mira kon un mondi asina grandi ta wordu pega na kandela dor di un chispa asina chikitu!

⁶I e lenga ta un kandela, henter un mundu di inikidat; e lenga ta poni entre nos miembronan komo loke ta kontamina henter e kurpa, i ta pega e kurso di nos bida na kandela, i ta wordu sendi na kandela dor di fiernu.

⁷Pasobra tur sorto di bestia salbahe i parha, di bestia ku ta lastra i bestia di laman ta wordu mansa i a wordu mansa kaba dor di e rasa humano,

⁸ma lenga ningun hende no por mansa. E ta un maldat sin sosiegu i yen di veneno mortal.

⁹Kune nos ta bendishona nos Senor i Tata; i kune nos ta maldishona hende, kende a wordu traha den e semehansa di Dios;

¹⁰for di e mesun boka ta sali tantu bendishon komo maldishon. Mi rumannan, e kosnan aki no mester t'asina.

¹¹Akaso for di e mesun boka un fuente ta saka tantu awa dushi komo awa marga?

¹²Mi rumannan, akaso un palu di figo por produsi oleifi, of un palu di wendruif por produsi figo? Tampoko un fuente di awa salu no por produsi awa dushi.

¹³Ken entre boso ta sabi i huisioso? Laga e mustra dor di su bon kondukta su obranan den suavidat di sabiduria.

¹⁴Ma si boso tin envidia amargo i egoismo den boso kurason, no sea arogante i asina gana kontra e berdat.

¹⁵E sabiduria aki no ta esun ku ta baha bin for di ariba, ma e ta terenal, natural, diaboliko.

¹⁶Pasobra kaminda ta eksisti envidia i egoismo, tin desordu i tur sorto di kos malu.

¹⁷Ma e sabiduria di ariba primeramente ta puru, despues pasifiko, suave, rasonabel, yen di miserikordia i bon fruta, imparsial, sin hipokresia.

¹⁸I e simia, kual su fruta ta hustisia, ta wordu sembra den pas dor di esnan ku ta hasi pas.