Read Papantla Totonac 1 Pedro 1 Bible Online

1 Pedro 1 - Papantla Totonac bible

1 Pedro 1

¹Pedro, un apostel di Jesu-Cristo, Na esnan ku ta biba komo stranhero, plama tur ront den Ponto, Galasia, Kapadosia, Asia i Bitinia, kendenan ta skohi

²segun e konosementu previo di Dios Tata, pa medio di e obra di santifikashon dor di e Spiritu, pa boso por obedese Jesu-Cristo i wordu gesprengu ku Su sanger: Grasia i pas sea ku boso den abundansia.

³Bendishona sea e Dios i Tata di nos Senor Jesu-Cristo, Kende, segun Su gran miserikordia, a hasi nos nase di nobo den un speransa bibu pa medio di e resurekshon di Jesu-Cristo for di e mortonan,

⁴pa optene un erensia ku ta inkoruptibel i sin mancha i ku lo no marchita, ku ta reserva den shelu pa boso,

⁵kendenan ta proteha dor di e poder di Dios pa medio di fe, pa un salbashon ku ta kla pa wordu revela den e ultimo tempu.

⁶Den esaki boso ta regosiha grandemente, ounke ku awor pa un tempu kortiku, si ta nesesario, boso a wordu afligi pa medio di varios prueba,

⁷pa e prueba di boso fe, ku ta mas presioso ku oro ku ta perese, ounke ku e ta wordu proba dor di kandela, lo por resulta den alabansa i gloria i onor ora Jesu-Cristo wordu revela;

⁸i maske boso no a mir'E, boso ta stim'E, i maske boso no ta mir'E awor, ma ta kere den djé, boso ta regosiha grandemente ku goso inekspresabel i yen di gloria,

⁹hanando komo resultado di boso fe e salbashon di boso alma.

¹⁰I di e salbashon aki e profetanan, kendenan a profetisa di e grasia ku lo a bin pa boso, a hasi buskeda i investigashon ku tur diligensia,

¹¹buskando pa sa ki persona of ki tempu e Spiritu di Cristo den nan tabata indika ora ku El a pronostika e sufrimentunan di Cristo i e glorianan ku lo a sigui.

¹²A wordu revela na nan ku no tabata nan mes, sino boso, nan tabata sirbi den e kosnan aki, ku awor a wordu anunsia na boso dor di esnan ku a predika e evangelio na boso pa medio di Spiritu Santu, manda for di shelu--kosnan ku e angelnan ta anhela di mira.

¹³Pesei, faha e hepnan di boso mente, sea sobrio, fiha boso speransa kompletamente riba e grasia ku lo wordu tresi na boso na e revelashon di Jesu-Cristo.

¹⁴Komo yunan obedesido, no konforma boso ku e pashonnan ku boso tabatin antes den boso ignoransia,

¹⁵ma meskos ku Esun Santu ku a yama boso, boso mes tambe sea santu den tur boso kondukta;

¹⁶pasobra ta para skirbi: "Boso lo ta santu, pasobra Ami ta santu."

¹⁷I si boso ta invoka komo Tata Esun ku imparsialmente ta huzga di akuerdo ku kada hende su obra, komporta boso mes ku temor durante di e tempu ku boso ta pasa riba mundu,

¹⁸sabiendo ku boso no a wordu redimi ku kosnan ku ta perese, manera plata of oro, for di boso manera bano di biba ku boso a ereda di boso antepasadonan,

¹⁹ma ku sanger presioso, komo di un Lamchi sin defekto i sin mancha, e sanger di Cristo.

²⁰Pasobra E tabata konosi kaba prome ku e fundashon di mundu, ma a parese den e ultimo tempunan aki pa boso motibu,

²¹kendenan pa medio di djé ta keredonan den Dios, Kende a lant'E for di e mortonan i a dun'E gloria, asina ku boso fe i speransa ta den Dios.

²²Komo ku den obedensia na e berdat boso a purifika boso alma pa un amor sinsero pa ku e rumannan, stima otro fervientemente di kurason,

²³pasobra boso a nase di nobo, no di simia ku ta koruptibel sino inkoruptibel, esta, pa medio di e palabra di Dios ku ta biba i ta permanese pa semper.

²⁴Pasobra: "Tur karni ta meskos ku yerba, i tur su gloria manera flor di yerba. Yerba ta seka i flor ta kai,

²⁵ma e palabra di SENOR ta permanese pa semper." I esaki ta e palabra ku a wordu predika na boso.