Read Papantla Totonac 1 Pedro 2 Bible Online

1 Pedro 2 - Papantla Totonac bible

1 Pedro 2

¹Pesei, poniendo un banda tur malisia i tur engano i hipokresia i envidia i tur kalumnia,

²meskos ku yunan resien nasi, anhela na e lechi puru di e palabra, asina ku pa medio di dje boso por krese den salbashon,

³si boso a purba e karino di Senor.

⁴I biniendo serka djé manera serka un piedra bibu, rechasa pa hende, ma skohi i presioso den bista di Dios,

⁵boso tambe, manera piedranan bibu, ta wordu edifika komo un kas spiritual pa un saserdosio santu, pa ofrese sakrifisionan spiritual ku ta aseptabel pa Dios pa medio di Jesu-Cristo.

⁶Pasobra esaki Skritura ta kontene: "Mira, Mi ta pone un piedra skohi na Sion, un piedra-di-skina presioso, i esun ku kere den djé lo no keda desapunta."

⁷Pa boso anto ku ta kere, e ta presioso; ma pa esnan ku no ta kere: "E piedra ku e trahadonan a rechasa, esaki a bira e piedra-di-skina prinsipal,"

⁸i, "Un piedra di trompeka i un baranka di ofensa"; pasobra nan ta trompeka pa motibu ku nan ta desobedesido na e palabra; i ta pa esaki nan a wordu destina tambe.

⁹Ma boso ta un rasa skohi, un saserdosio real, un nashon santu, un pueblo pekuliar, pa boso por proklama e alabansanan di Esun ku a yama boso for di skuridat na Su lus maraviyoso;

¹⁰pasobra un tempu boso no tabata un pueblo, ma awor boso ta e pueblo di Dios; boso no a risibi miserikordia, ma awor boso a risibi miserikordia.

¹¹Stimanan, mi ta roga boso komo peregrinonan i stranheronan pa apstene boso di pashonnan karnal, kualnan ta bringa kontra e alma.

¹²Laga boso kondukta ta ekselente meimei di e paganonan, asina ku ora nan kalumnia boso komo malechor, nan por, pa medio di boso bon obranan ku nan ta opserva, glorifika Dios den e dia di bishitashon.

¹³Somete boso mes pa kousa di Senor na tur institushon humano, sea na un rei komo esun den outoridat,

¹⁴of na gobernadonan komo esnan ku rei ta manda pa kastiga malechornan i pa elogia esnan ku ta hasi bon.

¹⁵Pasobra asina ta e boluntat di Dios, ku dor di hasi bon boso por silensia e ignoransia di hende bobo.

¹⁶Aktua komo hende liber, i no uza boso libertat komo un kapa pa maldat, ma uz'e komo esklabunan di Dios.

¹⁷Onra tur hende; stima e rumannan, teme Dios, onra rei.

¹⁸Sirbidonan, sea sumiso na boso shonnan ku tur respet, no solamente na esnan ku ta bon i suave, ma tambe na esnan ku ta trabahoso.

¹⁹Pasobra esaki lo hana aprobashon, si pa motibu di konsenshi pa ku Dios un hende wanta pena ora ku e ta sufri inhustamente.

²⁰Pasobra ki merito boso ta hana si, ora boso peka i wordu trata severamente, boso soporta esaki ku pasenshi? Ma si ora boso hasi loke ta korekto i ku pasenshi boso sufri pa e motibu ei, esaki ta hana aprobashon serka Dios.

²¹Pasobra boso a wordu yama pa e proposito aki, komo ku Cristo tambe a sufri pa boso, lagando un ehempel pa boso, pa boso sigui den Su pasonan,

²²"Kende no a komete pika, ni mentira no a wordu hana den Su boka";

²³i ora ku El a wordu zundra, E no a zundra bek; ora ku El a sufri, E no a menasa, ma a konfia Su mes na Esun ku ta huzga ku hustisia;

²⁴i E mes a karga nos pikanan den Su kurpa na e krus, pa nos, siendo morto pa pika, por a biba pa hustisia; pasobra pa medio di Su heridanan boso a wordu kura.

²⁵Pasobra boso tabata dwal manera karne, ma awor boso a bolbe serka e Wardado i Kuidado di boso alma.